ديوان / وليه عايشين ؟!
شعر / أميرة المحمدى
قبل مامشى من حياتك قلت أسلم بالكفوف
قلت أقولك عن شعورى كنت عايشة ف بحر خوف
لما كنت أزعل وأدارى كنت بهرب من عنيك
كنت خايفة لو تشوفنى ببكى م الحرقة عليك
كنت بِتهز ف كيانى كنت تكسرلى الأمان
كنت بتخلينى دايما خايفة أخسر الامتحان
كنت لما بحكى خوفى كنت تضحك م الكلام
مافتَكرتش مرة إنى عايزة منك اهتمام ؟!
كنت بتسيبنى ليالى كنت بشتاقلك كتير
كنت أقولك محتاجالك عايزة حضنك عايزة أطير
كنت رافض أحكى ضعفى كنت بتخلينى أتوه
قوللى إمتى كنت ضهرى لما كانوا بيكسروه ؟!
كنت تتعمد تخلى كل دمعى يشتكيك
كنت تكسر كل فرحة حتى حضنى مش لاقيك
كنت عايش جوا منى بس قلبك كان بعيد
كنت بحلم تبقى ليا قوللى قلبك ليه عنيد ؟!
قوللى ليه عشمت روحى بالحياة من غير جروح ؟!
وانت ناوى تمشى بدرى من حياتى يلا روح
مش هعاتبك مش هلومك وانت عايش دور ثبات
دانت زودت ف همومى لما حبى ف قلبى مات
قبل مامشى حابة أقولك كلمة عن قلبى اللى هان
كان يحبك رغم كدبك وانت حارمُه م الحنان
كان تملى يحب قلبك حتى لمّا كان يغيب
رغم شافك قاسى لكن برضه عايزك تستجيب
كان يقوللى إنه عايزك من زمان وانت القرار
ليه تخلى قلبى فجأة بالجفا يغير مسار ؟!
وانت عارف إنه يمكن مختلف لكن جميل
بس قلبك خلى حبه لك فى حكم المستحيل
حتى نفسى أعترفلك وأسألك من غير قيود
سهل ترمى ذكرياتنا اللى كان مفيهاش حدود ؟!
دا اللى بينا مش ليالى تتنسى لحظة فراق
انت عارف إن قلبك ويّا قلبى ف اشتياق
سهل تغدر باللى حبّك واعتبر قلبك نجاة ؟!
سهل تقسى ع اللى حسّك روح بتتمنى الحياة ؟!
سهل تهرب من عتابُه سهل تكتبله الوداع ؟!
سهل عندك تبقى بايع للى شارى وحلمه ضاع ؟!
بُكره تعرف قيمته غالى لما تلقى الكل خان
تفتكر كلمة بحبك لما قالهالك زمان
تفتكر خوفه عليك حتى لهفة قلبه ليك
لما كنت بتشتكى له من قسا الدنيا عليك
من وجع صابك وعلّم جوا منك زاد وعاش
رغم بتحاول تقاوم جرح قلبك مانتهاش
تفتكر لحظة ماحاول يبعدك عن كل سوء
تفتكر لحظة ما قرر ينصحك علشان تفوق
تفتكر لحظة غيابه وانت فاكرُه إنه المُدان
أصله مش ممكن يسلّم أو يع
يش دور الجبان
قلبى أكرمله إنه يبعد رغم مُر الاشتياق
رغم صِدقه ف حُبه دايما بس حظه يعيش فراق
تعليقات
إرسال تعليق