‏نفسي أرجع يوم لحضنك

‏بقلم /محسن رجب جودة 

‏نفسي أرجع يوم لحضنك.. وأمحِي خوف عشته بدأته

‏"مش اعتذار.. ده انكسار.. قلب جرب مية حصار"

‏كان جراحي ده قراري.. إني أبعد عنك أنت

‏يا حبيبي وده اختياري..

‏كنت عايش عمري كله.. كنت بفرح يوم ما أقوله

‏أنت حبي وأنت عمري.. ده أنت قلبي وأنت داري..

‏كان كلامهم غيرة منهم.. كل يوم دايماً سابقهم

‏حتى يوم ما بعدت عنك.. زاد كلامهم ف اختياري..

‏يا اللي صورتك جوه عيني.. لسه حضنك بيناديني

‏مهما دارت بيا دنيا.. حبك أنت اللي حييني.. 

‏واللي فات من عمري ضايع.. بين جراح وسهر مواجع

‏نفسي نرجع زي أول.. والغريب للبيت يراجع..

‏لو تسامحي على اللي كان.. نطوي صفحات الزمان

‏يرجع القلب لداره.. ونبني من تاني الأمان..

‏جيت أقدم اعتذاري.. عن جنوني وعن مراري

‏عن سنين ضاعت في غُربة.. كان تمنها هو ناري..

‏قلبي نادم ع اللي فات.. على الوجع والذكريات

‏نفسي نكتب سطر تاني.. يمحي كل قديم ومات..

‏أنا اللي بايع، وأنا اللي راجع..

‏أنا اللي شارب مُر المواجع..

‏كنت فاكر البعد راحة.. أتاري صمتي كان صرخة ضايع 

‏يا ملاذ الآه فـ صدري.. يا ضياع العمر بدري

‏أنا اللي سِجنت الروح بإيدي.. وأنا اللي جنيت على حب عمري..

‏بُعدي كان "سَم" وكاسه.. قَلبي تاه.. وفقد حواسه..

‏خلاص يا قلبي.. انسى الأنين

‏واروي عطشي بشوق السنين..

‏يا اللي رُجوعك.. كان ليّ عيد

‏نبض الحياة.. فيا جديد.. 

‏نفسي أرجع.. وأدينا رجعنا

‏وبحضن واحد.. ربي جَمعنا..

‏ما فيش رحيل.. ولا مستحيل

‏والحزن والله.. ما عاد يسعنا.

‏تم الكلام.. والقلب نام..

‏في حضن عشقه.. بسلام..