في الزحمه اللي ما حدش فيها شايف حد

بقلم/نشأت البسيوني 

في دنيا مليانه دوشه وصوت عالي وناس بتجري ورا كل حاجه وكأن العمر سباق ما فيهوش هدنه تلاقي نفسك واقف في نص الزحمه مش شايف غير الفراغ اللي حواليك رغم ان الدنيا مليانه وجوه مليانه اصوات مليانه خطوات لكن جواك سايب سكتك وعقلك بيعيد الاسئله اللي ملهاش جواب وقلبك بيقول انك مش بخير حتى لو ضحكت واتكلمت وشاركت وقلت إن مفيش حاجه 

غلط وفي لحظات كده تحس انك متخنق من غير سبب وان الضباب اللي قدام عينيك مش من الجو لا ده من اللي جواك وان الكلام اللي جوا صدرك مش عارف يطلع وان الدمعه اللي واقفه على طرف عينك مش لاقيه شجاعه تنزل مش علشان انت قوي لكن علشان اتعودت تمسك نفسك وما تورريش حد نقط ضعفك وفي لحظات تانيه تحس انك محتاج حضن تحط راسك فيه وتحكيله كل 

الحاجات اللي محدش يعرف عنها حاجه كل محاوله وقعت فيها كل امل اتسرق منك كل باب خبطته وطلع مش للخير كل حاجه قلت خلاص هتتصلح واتكسرت اكتر كل حد افتكرته ضهرك وطلع اول واحد يسيبك في اول مطب وتبدأ تسأل نفسك انت ليه بقيت كده ليه بقيت خايف تحكي ليه بقيت تبين القوه وانت من جوه هش ليه بقيت تضحك وانت مكوي ليه بقيت عايش على امل ضعيف رغم 

انك من سنين كنت شايف الدنيا كبيره ومستني منها حاجات حلوه والحقيقه ان الوجع علمك وان المواقف ربـتك وان الخزلان صقلك وان الدنيا كسرتك بس ما قدرتش تهدك وكل مره وقعت فيها كنت بترجع تقوم حتى لو على مهل حتى لو على ركبتك حتى لو بإيد مرتعشه بس كنت تقوم وده اللي محدش شافه ومحدش فهمه ومحدش قدر قيمته الناس بتحكم على الظاهر على ضحكتك على 

صورتك على كلمتين بتقولهم بس محدش عارف الليالي اللي ما نمتش فيها ولا الصراخ اللي بلعته ولا الدموع اللي مسحتها قبل ما حد ياخد باله ولا الحاجه اللي كنت بتتمسك بيها علشان ما تقعش ولا الروح اللي حاولت تهديها وانت اصلا مش قادر تهدي نفسك وفي وسط الزحمه دي كلها هتعرف انك مش محتاج الناس تفهمك انت محتاج نفسك ترجعلك محتاج تحضن ضعفك وتسامح قلبك 

وتفتكر ان اللي بينهار جواك مش نهايه ده بدايه وان الوحده مش دايما عقاب اوقات بتكون علاج وان السكون مش فراغ ده مساحه ربنا بيديها لك علشان تلم روحك وتعيد ترتيبك وتفتكر انك لسه قادر تقوم ولسه جوه قلبك نور ولسه فيك جزء طاهر الدنيا ما عرفتش تلوثه وفي يوم هتعرف ان الزحمه اللي كانت مخنقاك هي نفس الزحمه اللي هتعدي وان الشمس اللي غابت هترجع والحاجه 

اللي ضاعت هتتعوض وان وجعك مش نهايه قصتك ده مجرد فصل والفصل الجاي احسن اهدى اصفى وارحم