كتبت /مريم عوض
تدخل الفنانة إيناس عز الدين عام 2026 وهي أكثر نضجًا ووضوحًا مع نفسها ومع جمهورها، بعد سنوات من التجربة والتأمل والمواجهة. فنانة عرفت كيف تحافظ على صدقها الفني، وتؤمن بأن التطور الحقيقي لا يعني التنازل عن الجوهر، بل إعادة اكتشاف الذات بوعي وشجاعة. في هذا الحوار تفتح إيناس قلبها وتتحدث بصراحة عن قرارات مؤجلة، وأحلام عادت بقوة، ورؤيتها للفن المصري، وكيف تريد أن تعبر 2026… بهدوء يليق بمرحلة السلام الداخلي.
إيه أول قرار ناوية تبدأي بيه 2026 وكان مؤجل من زمان؟
بداية 2026 مبدئيًا سنة “مدادية”، لكن أول قرار حاسم أخدته فعلًا إني أبطل الطيبة الزيادة عن اللزوم، وأجمّد قلبي شوية. قررت أكون أكثر حسمًا في اختياراتي، سواء على المستوى الشخصي أو العملي. 2025 كانت سنة الفلترة، وبعد ما خرج ناس كتير من حياتي، حسّيت براحة حقيقية، والحمد لله.
ما القضية اللي شايفة إن الفن المصري ما زال بيتجنبها، وحابة تخوضيها الفترة الجاية؟
أتمنى إن الفن المصري يرجع لروحه الحقيقية زي ما كان من سبع سنين تقريبًا؛ وقت ما كنا بنستمتع بإخراج محترم، وسيناريو محكم، وقصص حقيقية بتدخل كل بيت وكل أسرة. كان فن من غير مجاملات، فن صادق بيحترم عقل المشاهد، وده اللي محتاجة أكون جزء منه.
مع كل سنة جديدة الفنان بيتغيّر… تحبي الناس تلاحظ إيه فيكِ في 2026؟
أنا بتغير فعلًا، وكل سنة بحاول أجدّد من إيناس في اللوك والشكل، لكن مش في شخصيتي. الجمهور بيحبك في أحسن حالاتك، وبيحب يشوف الجديد دايمًا، سواء في الفن أو في خططك. في 2026 في تغيير كامل وجزئي ومعنوي… تغيير في كل حاجة، لكن من غير ما أفقد نفسي.
هل في حلم قديم رجع يلح عليك مع دخول 2026؟ وليه دلوقتي؟
في أحلام كتير كانت مؤجلة، ويمكن لأني دلوقتي أنضج وأهدى، بقى عندي استعداد أواجه نفسي وأعترف إن في حاجات ماكنتش راضية عنها، ولازم تتصلّح. التوقيت هو اللي فرض نفسه.
إيه أهم درس اتعلمتيه من السنين اللي فاتت وناوية تطبقيه بجد في 2026؟
إن راحتي النفسية مش رفاهية. لازم أحمي نفسي، وأختار معاركي، وما أضيعش طاقتي في صراعات مالهاش لازمة.
لو عندك رفاهية الاختيار… تحبي 2026 تعدّي بهدوء ولا بصوت عالي؟
من غير تردد: بهدوء. نفسي السنة تمر بسلام وصوت واطي، كفاية ضوضاء وصراعات وصوت عالي. عايزة إحساس الارتياح، من غير جري ومن غير حد بيجري ورايا. 2026 بالنسبة لي سنة سلام
داخلي قبل أي حاجة.
تعليقات
إرسال تعليق