بين المواطن والمسؤول.. حكاية دايما ناقصها فهم

بقلم/نشأت البسيوني 

في بلدنا المواطن بيصحى كل يوم على حلم بسيط يعيش بكرامة يلاقي شغله يعالج عياله ويلاقي اللي يسمع صوته من غير ما يتقال له اصبر والمسؤول برضه بيصحى يمكن هو كمان عنده نية يغير ويطور ويصلح بس ساعات النية لوحدها ما تكفي لأن اللي بين المواطن والمسؤول بقى في فجوة كبيرة فجوة مليانة وجع وسكوت وتعب سنين المواطن شايف إن المسؤول بعيد ما بيحسش بيه مش شايف معاناته في طوابير المستشفيات ولا في فاتورة الكهرباء اللي بتزيد كل شهر ولا في الشغل اللي بقى صعب يتلاقى ولا في الأسعار اللي بتجري أسرع من النفس والمسؤول شايف إن المواطن دايما بيشتكي ما بيقدرش اللي بيتعمل ولا بيشوف حجم الضغط اللي على البلد كل واحد منهم عنده وجهة نظر بس مافيش بينهم حوار حقيقي مافيش نقطة التقاء تجمعهم على كلمة نبدأ منين ونصلح إزاي المواطن لما يشوف مسؤول بيزور منطقة أو يفتتح مشروع بيقول في نفسه يا ريت يشوفوا الناس الغلابة يا ريت يحسوا بينا شوية والمسؤول يمكن بيقول في نفسه يا ريت الناس تعرف إحنا بنحاول يا ريت يشوفوا الصورة الكبيرة مش بس الوجع الصغير بس الحقيقة إن الصورة الكبيرة مش هتبقى كاملة من غير التفاصيل الصغيرة والتفاصيل دي هي حياة المواطن

فيه مسؤولين بيتعبوا فعلا وبيحاولوا يخدموا وفيه مواطنين برضه بيتعبوا عشان البلد بس المشكلة إن دايما مافيش جسر تواصل حقيقي بينهم المواطن محتاج يسمع والمسؤول محتاج يسمع المواطن مش طالب رفاهية هو بس عايز يسمع كلمة حق يشوف عدل ويحس إن البلد دي مش ملك فئة معينة لكن لكل اللي بيحبها وبيخاف عليها البلد مش هتقوم بالمسؤول لوحده ولا بالمواطن لوحده دي دايرة لازم تكمل ببعضها المسؤول لازم ينزل الشارع يشوف الواقع مش الورق والمواطن لازم يساعد بدل ما يلوم طول الوقت لأن الوطن محتاج الكل يشيل معاه مش يسيبه ويشتكي منه

العدالة مش بس قانون العدالة إحساس والكرامة مش بس كلمة الكرامة إن المواطن يحس إن صوته له قيمة وإن المسؤول لما يقعد على الكرسي فاكر إن الكرسي ده تكليف مش تشريف والاحترام مش بس تحية رسمية الاحترام إن كل طرف يسمع للتاني من غير غرور ولا خوف يمكن اليوم اللي هنفهم فيه إننا مش خصوم لكن شركاء هو اليوم اللي البلد دي هتقوم فيه بحق لما المواطن يحس إن المسؤول بيشتغل عشانه بضمير ولما المسؤول يشوف المواطن بيحافظ على البلد كأنها بيته ساعتها مش هنحتاج نلوم بعض ولا نتهم بعض لأن الكل هيبقى عارف إن مفيش هما وإحنا فيه بلدنا

البلد دي تستاهل إننا نحبها بجد ونخدمها بضمير كل من مكانه المواطن بعزيمته وصبره والمسؤول بقراره وعدله ولو كل واحد فيهم بص للتاني بقلبه مش بعينه هيفهم إن مافيش فرق كبير بينهم غير في المنصب لكن الوجع واحد والحلم واحد والمستقبل كمان واحد وفي الآخر البلد عمرها ما هتتقدم بكلام لكن بالنية الصافية والعمل الصح والتواصل اللي فيه احترام متبادل لأن المواطن مش عدو المسؤول والمسؤول مش خصم المواطن هما الاتنين لو مسكوا إيد بعض هيبنوا وطن ما تهزش ريح