تاه الطريق بينا
تاه الطريق بينا ...
ولا إحنا اللى توهنا ونسينا..
اﻷيام بتمر علينا
وبتكتر فى الأحزان خطاوينا..
روينا الورد بالحب
وأنا وقلبى على الأشواك مشينا..
لا عارفين اللى بيعنا
ولا مين بجد اللى شارينا..
لقينا القمر صدقناه
وقلنا ده اللى هينور ليالينا..
غاب القمر بقينا فى ظلام
ناديت قلبى بأعلى صوت
وقُلت مين ينور الطريق لينا..
بكيت بدموع العين
وقُلت لنفسى إحنا عملنا اللى علينا..
اللى بنحبه بيقسى علينا
وإحنا عمرنا ماقاسينا..
غدر الزمان وضاع الحب
وندمنا وقولنا ياليتنا ما حبينا..
أنا وأنت يا قلبى
بإخلاص وبصدق وفينا..
خدنا أيه غير العذاب والألم ودموع عينينا..
أنظلمنا كتير وبرغم الظلم
عُمرنا للحب مانسينا..
تعبنا على قد ماتعبنا مالقينا حد ياداوينا..
وأنجرحنا على قد ما أنجرحنا
وتعذبنا من كتر اللى حصل فينا..
ولما قررنا نسافر ونهاجر
وعلى الرحيل ناوينا..
أزاى بنرحل ونعود من تانى لطريق الحب
ورجعنا أشتقنا وحنينا..
وكمان قدمنا الحنان أكتر من زمان
ومدينا بالعشق إيدينا..
لكن لقينا الزمان تغير
وكل شئ تغير وزاد جراحى مع اﻷلم
لاعرفنا على فين روحنا ولامن فين جينا..
وقُلت تاه الطريق بينا
ولا إحنا اللى توهنا ونسينا..
بقلم السيد محمد
تعليقات
إرسال تعليق