" وعسي أن تكرهوا شيئا وهو خير لكم "

 بسم الله الرحمن الرحيم حزين جدا والله حزين! 

 حزين على كل طالب وطالبة اجتهدوا وتعبوا وسهروا الليالي وبذلوا كل ما في وسعهم ثم جاءت نتيجة الثانوية العامة هذا العام على غير ما تمنوا ولم تكن المجاميع التي حصلوا عليها على قدر تعبهم واجتهادهم لكن لا حول ولا قوة إلا بالله

خلونا نفتكر دايما إن «وعسى أن تكرهوا شيئا وهو خير لكم» وإن ربنا سبحانه وتعالى لا يكتب لنا إلا الخير حتى وإن لم نفهم حكمته في اللحظة الأولى رسالتي هنا لكل طالب .. نتيجتك مش على قد تعبك متزعلش ومتعتبرش إن مستقبلك انتهى

ربنا يمكن موفقكش في مجموع الثانوية العامة اللي كنت بتحلم بيه لكنه قادر يوفقك في كلية تانية تكون سبب في نجاحك ولو موفقكش في الكلية اللي كنت عايزها ممكن يوفقك في حياتك المهنية أو يفتح لك بابا من النجاح والرزق لم يكن في حساباتك أصلا محدش يزعل على قضاء ربنا لأن ربنا عمره ما بيعمل حاجة وحشة لعبده والحقيقة اللي لازم كلنا نعترف بيها إن نتيجة الثانوية العامة عمرها ما كانت مقياسا حقيقيا لقيمة الطالب أو ذكائه أو مستقبله .. وأنا فعلا حزين جدا لما أشوف طالب مجتهد وممتاز وتعب طول السنة وفي النهاية نتيجته لا تعكس مستواه الحقيقي وفي نفس الوقت تلاقي طالب تاني مفتحش كتاب طول السنة وممكن تكون نتيجته أفضل سبحان الله الأرزاق والمقادير بيد الله .. لكن خلوني أقول لحضراتكم حاجة مهمة جدا ... ربنا مبينساش تعب حد يمكن تعبك مظهرش في النتيجة اللي في إيدك النهارده لكنه هيظهر في مكان تاني وفي وقت تاني وربما يكون النجاح الحقيقي اللي مستنيك أكبر بكتير من مجرد مجموع في ورقة وعشان كدا بقول لكل طالب وطالبة ادخل الكلية اللي شايف نفسك فيها واللي حابب مجالها واللي شايف إنك هتقدر تبدع وتنجح فيها مش مجرد الكلية اللي مجموعك جابها وخلاص ... المجموع مهم طبعا لكنه مش كل حاجة والكلية مش نهاية الطريق دي مجرد بداية لطريق طويل وصدقوني في ناس دخلت كليات كبيرة جدا ومحققتش اللي كانت بتحلم بيه وناس تانية دخلت كليات بسيطة واشتغلت على نفسها وطورت مهاراتها وربنا فتح لهم أبوابا لم تكن تتوقعها .. الكلية مش هي اللي بتصنع الإنسان الإنسان هو اللي بيصنع نفسه بعد توفيق ربنا

ورسالتي هنا من القلب لكل أب وأم .. ارجوكم ارحموا أولادكم ابنك أو بنتك محتاجين حضنك وسندك النهارده مش اللوم والتقليل والمقارنة بغيرهم متقولوش فلان جاب أكتر منك وفلان دخل كلية أحسن منك ابنك تعب واجتهد وربنا كتب له النتيجة دي فاحمدوا ربنا وارضوا بقضائه وقدره وخففوا عن أولادكم .. النتيجة مش نهاية الحياة ومش شهادة على إن ابنك فاشل أو ناجح دي مجرد مرحلة وانتهت ولسه الحياة كلها قدامهم والأهم من كل دا إننا نؤمن إن ربنا سبحانه وتعالى قدّر لكل إنسان رزقه وطريقه ونصيبه وما كتبه الله لنا سيأتينا وما لم يكتبه لنا لن يكون لنا

فـ يا كل طالب زعلان من نتيجته ارفع رأسك وابدأ من جديد ومتسمحش لرقم مكتوب على ورقة إنه يحدد قيمتك أو يحكم على مستقبلك

اشتغل على نفسك اتعلم طور مهاراتك خليك شاطر في مجالك وخلي عندك يقين إن ربنا قادر يحول أصعب بداية لأجمل نهاية .. وفي النهاية مليون مبروك لكل طالب وطالبة نجحوا ومبروك لكل مجتهد تعب ووصل وربنا يعوض كل طالب شايف إن النتيجة مكانتش على قد تعبه ويفرح قلبه باللي جاي

وأنا شخصيا أطلب من كل أصدقائي وأحبائي إنهم يدعوا لي بالتوفيق والنجاح ويدعوا لكل زملائي في دفعتي لأن أنا بإذن الله هكون واحدا من طلاب الثانوية العامة السنة القادمة وأسأل الله أن يكتب لنا جميعا الخير والتوفيق والنجاح وأن يجعل تعبنا واجتهادنا سببا في تحقيق أحلامنا

اللهم لا سهل إلا ما جعلته سهلا وأنت تجعل الحزن إذا شئت سهلا ... ربنا يكتب لنا جميعا الخير ويجعل القادم أجمل مما نتمنى