هناء سالم
زمان كان قليل جدا لما حد يفكر أو يوافق على فكرة القسط أو القرض
كان بيشوف ده عيب وتكليف للنفس فوق طاقتها ..
وكانت اشهر جملة بتتقال في الزمن ده
"على أد لحافك مد رجليك "
لكن في هذا العصر أصبح المسيطر على تفكيرنا
فكرة
"الناس هتشوفني ازاي
ويقولوا عليا إيه؟؟اقل منهم...!!
بقينا بتشتري كل حاجه بالديون والأقساط
وبنرهق نفسنا علشان نبقى في مظهر افضل وأعلى من مستوانا الحقيقي.
رحلة مظاهر بتجرنا لديون بكل هدوء وسلاسه
مش بنشتري اللي بنحتاجه بس لكن نشتري كماليات ورفاهيات
ملابس أغلى من قدرتنا
مناسبات بأفكار أكبر من طاقتنا
هواتف وقروض وأثاث اغلى من امكانياتنا
لكن السؤال اللي بيطرح نفسه
لمين بنعمل كده فعلا؟
ضغط خفي لا يُقال بصوت عال
ماحدش بيجبرنا بشكل مباشر لكن الجميع بيشارك في الضغط
مقارنة دايمة على السوشيال ميديا
صور لحياة تبدو بلا نقص
حفلات ومظاهر تُعرض كأنها معيار النجاح
دخلنا في سباق مع نفسنا
وافتكرنا اننا كده بنرفع من مستوى معيشتنا
ومع مرور الوقت ...تتحول الاستثناءات إلى نمط حياة
وتبدأ الفواتير في التزايد…
والديون هنا مش مجرد أرقام
لكن ضغط يومي وقلق دائم وشعور تقيل وبيخنق
والمفارقة هنا
محاولة التظاهر بالاستقرار والثبات
و في الحقيقة احنا بنحترق مع الوقت نفسيا وبيبدأ الخوف من عدم القدرة حتى على توفير الأساسيات نفسها
زي الاكل والشرب والمصاريف اليومية البسيطة
حتى دي أصبحت عبء مع تراكم الديون
والنتيجة البحث عن مزيد من سبل الديون وبالتالي
زيادة التوتر الأسري
والمشكلات الزوجية
وإهمال اهم دور التواجد مع الأبناء بذهن صافي والقدرة على الاستماع إليهم وتربيتهم نفسيا قبل ماديا
هنا بقى لازم وقفة مع النفس ...
وتغيير طريقة تفكيرك
الحياة مش سباق مين يملك اكتر
ومين أغنى...
لكن الحياة فرصة انك تقدر تعيش مرتاح البال بتسعى
وعندك طموح صحيح
لكن طموح يرفعك بالتدريج مش بالديون
مش لازم تثبت للناس إنك أحسن من ظروفك… كفاية تعيش بكرامة من غير ما تكسرك المظاهر.
اختار راحتك الحقيقية حتى لو بسيطة لأن الديون بتخلص لكن الضغط النفسي بيسيب أثر أطول بكتير.
تعليقات
إرسال تعليق