شعر / أميرة المحمدى
بحبك حب لو تسمع مشاعرُه تقول دوا موصوف
لو العشاق فى أخبارهم حكوا عنه لداوىٰ ألوف
بحبك حب مش عادى ولا مجنون ولا هادى
عشقت الروح وتنهيدك وعشقى خارج المألوف
عشان بهتم وأتأثر بكل ما فيك فمشتاقة
ومش هاكتم ولا أخبى وأنا فى الحب سباقة
أنا عايزاك تكون ليا حبيب وغلاوته فى عنيا
وماتكونليش وجود عابر مجرد قلب فى علاقة
بحبك حب يتّاقل بفص ياقوت وألماسه
جميل وجماله متفصل كأنه سلاح هوىٰ رصاصة
يابختك باللى لَك عندى مشاعر عشق وتحدى
ومهما أخبى وأتمنّع مشاعرى قوية حساسة
أنا عايزاك تكون فارس تكون حامى حِما قلبى
وقائد منتصر غاوى هزيمته عشان ينول حبى
تكون القلب والدَّقة وتُبقى الشِّدة والرقة
وتِكره دنيتك لما أغيب ويطمنك قربى
وتحلم بيا وأجيلك حورية مفيش لقلبى مثيل
تلف الدنيا وتدّور وترجع تحكى ع التفاصيل
وتتغنى بتأثيرى وتتأكد مفيش غيرى
وتكتبنى فى أبياتك قصيدة عشق عمره طويل
برغم الدنيا مليانة قلوب حواليا بتنادى
وبتحاول وبتعافر وبتشاغل وبتهادى
بغيرك قلبى مش راضى ومهما يحاولوا ع الفاضى
يطول ليلى وبشتاقلك يا سر ف نومى و سهادى
تعالى ودوق جمال حبى أنا مشتاقة لعيونك
وحضنى كبير بيتعهد ويحلفلك لهايصونك
ووعد نعيش سوا نفرح وجنة حبنا تطرح
تعالى حبيبى واستسلم وضم ورودى لغصونك
تعليقات
إرسال تعليق