بقلم: راندا أبو النجا
هو احنا ليه بنيجي على نفسنا؟
ليه لما بنتوجع، بدل ما نطبطب على روحنا، بنزود الضرب؟
ليه بنشيل فوق طاقتنا، ونستحمل اللي مايستحملوش جبل، ونرجع بالليل نجلد في نفسنا عشان "قصرنا"؟
بنستنى رسالة تصلح اليوم، مكالمة تغير المزاج، حد يخبط على الباب يقول "أنا شايفك تعبانة".
بنستنى المنقذ.
والمنقذ مشغول لأنه مستني حد ينقذه هو كمان.
كلنا واقفين في طابور طويل، كل واحد ماسك تذكرة مكتوب عليها "إستناني"
والحقيقة؟ الشباك قفل من زمان.
بنيجي على نفسنا لما نفتكر إن مفتاح الأمان في جيب حد تاني
فنستحمل قلة التقدير، ونبلع الإهانة، ونقول "معليش" عشان المركب تمشي.
والمركب ماشية بس إحنا اللي بنغرق.
بنقضي نص العمر ندور على "الكتف".
كتف نسند عليه، كتف نعيط عليه، كتف نشيل عليه همومنا.
وبعد ما نلاقيه، بنكتشف إن الأكتاف بتتعب، وبتمل، وبتمشي.
والأكتاف الثابتة الوحيدة هي اللي طالعة من ضهرك انتي.
نيجي على نفسنا لما نصدق إن قيمتنا متعلقة بوجودهم
.
فنسكت لما نتظلم عشان "منخسرهمش".
نقول "أنا كويسة" واحنا بنموت عشان "منبقاش حمل".
نطفي نورنا عشان عينهم متتعبش.
مش قسوة. دي رحمة.
لما تعرفي إنك لو وقعتي محدش هيشيلك، هتتعلمي تمشي بثبات أكتر.
لما تصدقي إن الزعل مش هيخلصه حضن، هتتعلمي تحضني نفسك.
القوة مش إنك ما تعيطيش.
القوة إنك تعيطي لوحدك، وتمسحي دموعك بإيدك، وتقومي ترتبي كركبة يومك عشان بكرة لازم يبدأ نضيف.
القوة إنك تبقي أمك وأبوكِ لنفسك.
تطبطبي على كتفك وتقولي "معليش، بكرة أحسن".
تعملي لنفسك شاي وتقعدي في البلكونة تسمعي صوت الشارع، وتكتشفي إن الونس الحقيقي هو صوتك وانتي بتقولي "أنا كفاية"
الناس مش وحشة. الناس بس تعبانة.
كل واحد شايل شيلته، وماشي بيها بالعافية. مش هيقدر يشيل شيلتك كمان.
فليه تشيلي شيلتهم فوق شيلتك؟ ليه تيجي على نفسك عشان تريحيهم؟
بطلي تستني.
بطلي تستني التقدير اللي مجاش، والإعتذار اللي إتأخر، والحب اللي كان مشروط.
بطلي تستني إذن منهم عشان ترتاحي. الراحة قرارك انتي.
اقفلي باب الأوضة عليكي، وعيطي لما تحتاجي.
وبعدين قومي اغسلي وشك، وحطي كحل، واطبخي الأكلة اللي بتحبيها.
كليها وانتي بتتفرجي على مسلسل، وإضحكي بصوت عالي.
محدش هيقولك صوتك عالي عشان إنتي لوحدك. ودي مش وحدة دي حرية من جلد الذات.
إحنا مش ضحايا إحنا الناجيين.
بنينجو كل يوم من سجن "لولاه كنت".
بنينجو من وهم إننا لازم نتحرق عشان ندفي غيرنا.
في الآخر هتكتشفي إن السلام مش إنهم يرضوا عنك.
السلام لما انتي ترضي عنك.
السلام صوت هادي جواكي بيقولك "أنا معاكي في عز ما الكل سابك.
صوت بيطلع لما تبطلي تلومي نفسك، وتبدأي تسامحيها.
بطلي تيجي على نفسك.
الونس الحقيقي لما تبقي قادرة تقعدي مع نفسك ساعة كاملة من غير ما تمسكي الموبايل، من غير ما تهربي.
تقعدي... وتسمعي.
وتحبي اللي بتسمعيه.
محدش جاي يصلحك.
وخلاص بطلنا نستنى.
أصلنا اكتشفنا إن نفسنا اللي كنا بنيجي عليها، هي الوحيدة اللي باقية لنا.
جوه.
حمدالله على السلامة يا "أنا".
كل قسوة... آن الأوان نطبطب
ونعاهد نفسنا: اللي جاي رحمة، واللي فات سماح، وأنا أولى بيا
تعليقات
إرسال تعليق