للشاعر محمد عبد العزيز رمضان
وبنده وأقولك كفاية السكوت
ودمعك حقيقي نهاية كلام
وقولها معايا ولو يوم تموت
فموتها بعزة كفاية انهزام
هتنجح هتقدر تعدي السقوط
ولا يوم يهمك جموع اللئام
ونيلك في لونك ولون الجدود
وشمسك بتشرق بطيبة وسلام
وواقف بقوة وحامي الحدود
ونورك مشقشق برغم الظلام
وفيك الجناين بتطرح ورود
بحبك يا بلدي ودايب غرام
وبنده وأقولك عدوك جبان
ولو يوم يقرب هيخسر كتير
ولازم يفكر في كل اللي كان
وينسى بإنه هيبقى الكبير
حفرنا بروحنا دروب الزمان
عبرنا بقوة وعزم الضمير
وبنده وأقولك عدوك سراب
سلاحه الندالة وطول الهروب
وعمره ما يبني بيهوى الخراب
وعايش بخسة وخلق الحروب
نهايته قريبة مصيره التراب
ومن له بداية نهايته الغروب
وبنده وأقولك طريقك طويل
ولازم تفكر في كل اللى فات
ولو يوم هتنسى عبورنا دليل
بطولة كتبها بروحه اللي مات
تعليقات
إرسال تعليق