الدنيا قلابة اوووى

 كتبت الإعلامية دعاء نور عن 

الدنيا قلابة اوووى !! 

غريبة قوي الدنيا دي بتتغير في ثانية واحوالنا بتتغير معاها ..!! فجأه ومن غير ما تحس تلاقي كل حاجة حلوة حواليك اتغيرت الناس والأشياء وكل حاجة مبقتش في مكانها !! كل حاجة اتشقلبت القريب بقا بعيد وغريب  والبعيد يمكن كان أحسن من القريب !! اللي كان يومك مبيخلاش منهم بقيت لازم تبعد عنهم 

اللي كنت بتفرح بمكالمتهم وميعديش يوم غير لما ترغوا بالساعات بقيت تشوف رقمهم ومش عايز ترد قبل ما يجي بكرة وتبقا عايزهم بس مش لاقيهم 💔 اللي كانوا عارفين أدق تفاصيلك بقوا ميعرفوش حاجة عنك !! واللي كنت بتضحك وتهزر معاهم من قلبك بقيت تشوفهم متمدش ايدك حتي وتسلم عليهم ..

 اللي كنت بتحبه امبارح قلبك مبقاش شايفه النهارده !! واللي كنت مش شايفه اصلا بقا كل حاجة حلوة عندك .. اللي كان بيبسطك بقا هو سبب وجعك واللي كنت بتجرى عليه في وجعك سيبته ومشيت  اللي كان قلبك مبيبطلش كلام معاهم فجاه بقا قلبك أخرس في وجودهم مبينطقش  واللي كانوا أخر ناس ممكن تفضفضلها بقوا معاهم أكبر أسرارك ..!! الفرحة اتكسرت والضحكة راحت والقلب اللي كان بيجري عليهم بقا يجرى منهم .. الناس مبقتش هي هي والحجات الحلوة كلها أختفت ربنا يكفينا شر الناس اللي ملهاش عزيز ولا غالي، والناس الغدارة، والناس قليلة الاصل وناكرين الجميل اللي مبيطمرش فيهم،والناس اللي فى الوش تحضن وفي الضهر تتكلم ،وأصحاب المصلحه يااااااارب وأحباب وقت الفراغ يارب يكفينا شر الخنقه اللى من غير سبب دى ،وشر الحزن اللى يغير ملامحنا، وتحجيرة القلب ،وشر الحب لو هيقل القيمة ، وشر الكره بعد محبه ، وشر الصدف اللي توجع القلب ، وشر الانتكاس بعد الثبات وشر الشتات بعد الوصول وسوء الإختيار .. يارب