حين تنفجر الحقيقة بصمت

بقلم/نشأت البسيوني 

في لحظة غريبة مافيهاش مقدمات ولا علامات بتحس إن الدنيا اللي كنت فاكرها مستقرة تحت رجليك بتتهز فجأة هزة مالهاش صوت هزة ساكتة لكنها تكسر جوه القلب أكتر من أي انهيار عالي بتحس إن في حقيقة كانت مستخبية عنك سنين طويلة وقررت تظهر في وقت مافيهوش استعداد مافيهوش دفاع مافيهوش أي حصانة وكأنها بتختار اللحظة اللي تكون فيها أضعف علشان 

تواجهك بأقسى درس الحقيقة دي مش شرط تكون خيانة ولا فقدان ولا صدمة ساعات بتكون إدراك إدراك مرّ وصادم عن نفسك إنك كنت بتجري ورا طرق مش طرقك وبتحارب في معارك مش معاركك وبتثبت وجودك في أماكن ما كانش المفروض تبقى فيها من البداية تكتشف إن اللي ضاع منك ماكانش وقت كان عمر. وإن اللي اتأخر ماكانش وصولك كان فهمك وإن اللي اتكسر ماكانش 

حلم كانت صورة كنت عاملها لنفسك وماكانتتش حقيقتك وتبدأ تفهم إن الإنسان ساعات بيخسر نفسه وهو فاكر إنه بيكسب الدنيا يدي من روحه للناس اللي ما سألوش فيها يكدس جواه وجع ساكت ما يعرفش يطلعه ويعلق آماله على أبواب كان مكتوب عليها من الأول مقفول وتلاقي نفسك واقف في آخر اليوم بتسأل السؤال اللي بيكشف كل الحكاية هو أنا ليه كنت بتهرب من الحقيقة 

أكتر مما كنت بدوّر عليها ولما الحقيقة تنفجر بالصمت ده بتعيد ترتيبك من جديد من غير ما تطلب إذنك تشيل ناس وتحط ناس تغير أولوياتك تسيب أماكن تقفل طرق وتفتح أبواب لجواك قبل ما تفتحها لبره تبقى أصدق مع نفسك وأوضح مع قلبك وأقسى على اللي يستهلك روحك وأرحم بكتير على اللي يستحق مكان فيها وتعرف إن مش كل سكوت ضعف ومش كل انسحاب هروب

ومش كل خسارة ألم ساعات الخسارة إنقاذ وساعات السكوت حكمة وساعات الوداع بداية مش نهاية وتوصل للنقطة اللي تكتشف فيها إن الحقيقة اللي كسرتك هي نفسها اللي بنتك وإن الصدمة اللي هدت فيك حاجات كانت لازم تهد وإن الوقوف بعد الانفجار ده هو أول خطوة للنسخة اللي كان لازم تكونها من زمان نسخة أهدى أقوى أوضح وأقرب لنفسها بكتير نسخة ما 

بقتش تستنى حد يفهمها وما بقتش توجع نفسها علشان ترضي حد وما بقتش تحارب علشان تفضل في حياة ناس ماقدروش قيمتها نسخة أخيرا بتشوف روحها من غير ضباب وبتسمع صوتها من غير تشويش وبتحس بقيمتها حتى لو ماحدش حسها وفي آخر الرحلة دي كلها تكتشف إن الحقيقة مهما كانت موجعة فهي دايما عادلة وإن الوجع اللي بيطلع منها مش عقاب ده تحرير وإن اللي اتاخد 

منك كان عبء مش سند واللي انتهى كان نهاية لازم تحصل واللي وقع هو اللي كان مانعك تشوف الطريق اللي مستنيك من زمان وتفهم إن الانفجار اللي حصلك بالصمت ده كان بداية حياة مش سقوط روح