سيرك التريند "

بقلم : ماهر عبد الباقي 

لما الجهل بقى "براند" والتفاهة لحست الدماغ!

​إحنا بقينا عايشين في زمن غريب زمن ملوش كتالوج.. زمن "المسخ الرقمي" لو صحيت الصبح وفتحت موبايلك هتلاقي نفسك دخلت "سيرك" كبير بس للأسف المهرجين فيه مش بيضحكوا، دول بيبكّوا على حالنا.

​بقى" كل من هب ودب" بقى نجم!

​زمان كان اللي عايز يشتهر لازم يكون عنده موهبة علم، أو حتى صنعة في إيده. دلوقتي؟ المعادلة اتغيرت خالص كل اللي محتاجه موبايل بكاميرا وشوية بجاحة وقدرة فظيعة على استعراض الجهل بقينا نشوف "نكرات" بقوا نجووم مجتمع لمجرد إنهم عملوا فيديو تافه أو صوروا خناقة مع زوجاتهم أو أزواجهم أو طلعوا يرقصوا بحركات مستفزة الجهل مابقاش حاجة نتكسف منها دلوقتي ده بقى "بضاعة" بتتباع وتتشري وليها زبون!

​لما جنون الشهرة فى " اللايك" يغطي على الكرامة!

​التريند بقى زي "المخدرات" اللي بيجربه مرة بيبيع الغالي والرخيص عشان يفضل فيه. وصلنا لمرحلة إن الخصوصية اندبحت على قبلة المشاهدات.

​تشهير بالأهل ماشي.

​تمثيل قصص خيانة وفضائح وهمية شغال.

​تصوير لحظات المرض والموت والمقابر مفيش مشكلة!

المهم العداد يرمي والأهم الناس تتكلم أصبح" اللايك" أهم من لقمة العيش وكلمة "شير" بقت أغلى من كلمة حق الناس دماغها اتلحست فعلاً وبقت بتجري ورا سراب اسمه الشهرة حتى لو الثمن كان كرامتهم وسمعة عيالهم 

لكن الحقيقه ​إحنا اللي عملنا في نفسنا كدة! ​خلينا نكون صرحه مع نفسنا.. مين اللي كبّر "التافهين" دول؟ إحنا طبعاً! لما ندخل نتفرج "عشان نضحك عليهم" إحنا كدة بنرفعهم. لما نعمل "كومنت" حتى لو بنشتمهم إحنا بنشجع التفاهات بنقول " الفيديو ده مهم ارفعه "

إحنا اللي بنسيب المحتوى الهادف والدكاترة والعلماء والصنايعية الشطار ونروح نتفرج على "يوميات فلان وعلان" وهما بياكلوا وبيهزروا هزار ماسخ. إحنا اللي عملنا من "القزم" عملاق ولما كبر وداس علينا رجعنا نشتكي!

​تاه القدوه وضاعت المثل العليا مع جيل "التيك توك" 

و​الكارثة الكبيرة في العيال الصغيرة اللي طالعة. لما الطفل يشوف إن اللي بيسقط في مدرسته وبيعمل فيديوهات هبلة بيركب أحدث عربية وبيمسك ملايين، هيتعلم ليه؟ هيتعب نفسه في مذاكرة ليه؟

إحنا بنخلق جيل "سطحي"جيل شايف إن النجاح "فهلوة" مش مجهود وإن الشطارة في"الفهلوة" مش في العلم دي قنبلة موقوتة بتنفجر في وش قيمنا وأخلاقنا كل يوم ​وسبق واتكلمت فى الموضوع ده من أكتر من عشر سنين هي كلمة هقولها لوجه الله

​يا جماعة "التريند" مش هيأكلنا عيش ولا هيبني بلد الشهرة اللي من غير أساس هي مجرد "بلونه " وهتفرقع في وش صاحبها في الآخر ارحموا عقولكم وارحموا ولادكم " الإعدام بالتجاهل" هو الحل الوحيد لكل تافه وتافهه متصدر المشهد قاطعوا المحتوى الهابط ورجعوا قيمة "الستر" والخصوصية لبيوتكم.

​التافه هيفضل تافه مهما لِبِس "براندات" والجاهل هيفضل جاهل مهما جمع "متابعين"

العقل زينة والكرامة مابتتشريش بـ " لايك وكومنت وشير "