حين يسقط الصبر وتتكلم الروح

بقلم/نشأت البسيوني 

حين يسقط الصبر وتتكلم الروح تلاقي كل السنين اللي فاتت واقفة قدامك في لحظة واحدة كأن الزمن كان مستني لحظة انهيارك علشان يكشف لك حقيقتك وحقيقة الناس اللي حواليك تلاقي نفسك بتتساءل ازاي قدرت تمشي سنين وانت شايل كل الوجع ده على كتافك وازاي كنت بتضحك وانت من جواك مكسور وازاي كان عندك لسه أمل رغم إن كل الأبواب كانت مقفولة في وشك ويمكن 

لأنك كنت طيب زيادة أو صابر زيادة أو ساكت زيادة أو يمكن لأنك كنت فاكر إن الدنيا مهما قست عليك عمرها ما هتستمر كده لكن الحقيقة إن القسوة ساعات ما بتجيش من الدنيا القسوة بتيجي من أقرب الناس اللي كان المفروض يحافظوا عليك وتلاقي نفسك بتفتكر مواقف عمرك ما نسيتها مواقف حد كنت شايفه سند بس طلع بس بيستند عليك حد كنت شايفه أمان وطلع هو أكتر واحد 

يخوف حد كنت فاكر إنك جزء من حياته وطلع إنك مجرد صفحة بتتقلب لما يزهق حد كنت بتستناه وهو عمرك ما كنت في باله وتبدأ تفهم بالنار مش بالكلام إن في ناس وجودهم في حياتك وجع وإن بعدهم شفاء وإنك مش مجبور تفضل في مكان بيطفّي نورك ولا مع بشر بيستغلوا طيبتك ولا في علاقة أنت الوحيد اللي بتدي فيها

ولما الروح تتكلم بتقول كلام ما تنفعوش المجاملات ولا الأقنعة 

بتقول إنك اتظلمت إنك اتأذيت إنك اتخان إنك وقعت واستحملت أكتر من طاقتك بتقول إنك كنت بتبني في قلوب ناس ما تعرفش غير الهدم وإنك كنت بتدي بكرم لقلوب ما تعرفش غير الأخذ بتقول إنك تعبت من الصمت من الذوق من التحمل من إنك تكون دايما الطرف الأقوى مع إنك من جواك كنت الطرف الأكثر وجعا وتبدأ تشوف نفسك بشكل جديد تشوف إنك رغم كل اللي حصلك لسه 

واقف وإنك رغم كل اللي اتسرق منك لسه باقي وإنك رغم كل اللي اتكسر جواك لسه قلبك قادر يحب ويعطي ويخاف على غيره وإنك مش ضعيف زي ما كنت فاكر ولا منكسر زي ما كان البعض متخيل وإنك كنت بتمشي وسط نيران محدش شايفها غيرك ومع ذلك ما قلشتش ولا انهرت ولا وقفت نص الطريق وتفهم إن ربنا كان بيشيل من حياتك ناس مش خير ليك وإن اللي فقدته ما كانش رزقك وإن 

اللي بعد عنك كان عبء وإن اللي اتكشف لك كان لازم يتكشف علشان تشوف الطريق بوضوح وإن اللي اتألمت منه كان جبر ليك وإن اللي وجعك علمك واللي كسر قلبك قواه واللي بعد عنك خلى مكان لاستقبال اللي يستاهلك وفي آخر الكلام تلاقي إن الروح لما تتكلم بتعريك من كل حاجة مزيفة وبتخليك تشوف حقيقتك واللي حواليك وتفهم إن الصبر مش دايم وإن التحمل مش واجب وإن 

كرامتك مش مفروض تتكسر لأي حد وإنك تستاهل حد يحبك بصدق يحافظ عليك يتشرف بوجودك يفرح بيك مش حد يشوفك اختيار احتياطي ولا محطة مؤقتة ولا باب يرجع له لما يتخانق مع حد تاني وتعرف إنك مش هتقبل تاني بنص علاقة ولا نص احترام ولا نص حضور لأنك اتعلمت بالطريقة الأصعب إن النصوص هي اللي بتكسر القلوب وإن الحقيقة مهما كانت قاسية عمرها أرحم من 

الوهم اللي بيعمي وتطلع من كل ده مش زي الأول لكن أقوى أهدى أعمق وأنضج لأن الروح لما تتكلم ما بتكذبش ولما الصبر يسقط الح

قيقة بس اللي بتفضل