صوت الوجع اللي محدش سامعه

بقلم/نشأت البسيوني 

هناك لحظات في حياة الإنسان يصبح فيها الصمت أصدق من الكلام والابتسامة جدارا يخفي وراءه حربا لا تهدأ

تجلس وسط الناس تضحك وتشاركهم الحديث وكأنك بخير بينما في داخلك شيء يتفتت ببطء يصرخ ولا يسمع ينزف ولا يرى

إنه الوجع اللي مش بيحتاج دموع الوجع اللي يوجعك لأنك مش قادر تشرحه لأنك لو اتكلمت هتجرح ولو سكت هتتوجع أكتر

الوجع اللي يخليك تصحى الصبح وتحط وش الضحك وتدخل على الناس كأنك مش متأذي كأنك بخير كأنك مش مليان جروح

تضحك معاهم وتتكلم وتعمل نفسك خفيف بينما في قلبك ألف وجع بيكسر فيك وانت ساكت

تحاول تبين إنك قوي علشان محدش يشوف ضعفك لأنك خلاص بطلت تصدق إن حد ممكن يفهمك بصدق

كل مرة جربت فيها تبوح اتكسرت وكل مرة قلت أنا مش بخير ردوا بابتسامة سطحية كأنك بتهزر

فقررت تسكت قررت تخلي وجعك لنفسك لأنك اكتشفت إنك لو حكيت هتوجع اللي بتحبهم وهتزعل اللي ما يستحقوش يزعلوا

في الليل لما الدنيا تسكت بتقعد مع نفسك وتسمع صوتك اللي محدش سامعه

صوتك الداخلي اللي بيقول تعبت

تعبت من الصبر من المجاملة من التظاهر بالقوة من أنك تكون دايما السند حتى وانت اللي محتاج اللي يسندك

تعبت من أنك تضحك علشان الناس ما تزعلش ومن أنك تخفي دموعك علشان محدش يشفق عليك

أحيانا بتتمنى تبكي قدام حد يفهمك من غير ما تتكلم حد يحس بيك من غير ما تشرح حد يطبطب عليك بدل ما يقولك شد حيلك

بس للأسف الكلمة اللي بتوجع أكتر من الوجع نفسه هي ما كنتش واخد بالي

اللي حواليك مش شايفين ومش لأنهم قساة لكن لأنك بتخفي وجعك بإتقان

صنعت لنفسك صورة الإنسان القوي اللي مش بيتكسر واللي بيحتمل كل حاجة فصدقوك صدقوك ونسوا إن أقسى الناس وجعا هما اللي بيضحكوا أكتر

ووسط كل ده تفضل ساكت مبتسم بتحاول تكمل

مش علشان مش موجوع لكن علشان لسه في قلبك جزء مؤمن إن اللي ساكت عليه ربنا سامعه

ربنا اللي شايف الوجع اللي محدش لاحظه والدمعة اللي حبستها علشان ما تكسفش حد والنفس اللي خنقك وأنت بتقول أنا كويس

يوما ما هيرجعلك حق كل وجع سكت عليه وكل خذلان اتجاوزته بصمت وكل دمعة بلعتها علشان تحافظ على غيرك

هييجي اليوم اللي تضحك فيه بصدق من غير ما تخبي وتفرح بسلام حقيقي بعد ما كنت بتتظاهر بالسعادة

فلا تحزن من وجعك الصامت لأن الله يسمعك في كل مرة ما قلتش فيها تعبت

وما دمت تصبر فاعلم أن الله يعد لك راحة تليق بكل الأوجاع التي أخفيتها خوفا على من تحب

ابق كما أنت موجوعا في صمت لكن كريما في شعورك طيبا رغم القسوة مبتسما رغم الجرح لأنك من أولئك الذين علمهم الألم كيف يكون النبل في أقسى صور الحياة