الاء عصام من ذوى الهمم تقدم الشكر بسرد صحفى لكل من قدم لهم يد العون وعلى رأسهم الرئيس عبد الفتاح السيسي مبادرة "تمكين "

المنيا /كامل شحاته 

قدمت الطالبة الاء عصام من ذوى الهمم بجامعة المنيا على صفحتها الشخصية للفيسبوك فى سردك صحفى إمتنانها بمبادرة تمكين وبرنامجها التنفيذى بجامعة المنيا والقائمين والداعمين لها وعلى رأسهم فخامة الرئيس السيسى 

حيث كتبت :

ختام فعالية من أجمل وأقرب الفعاليات لقلبي 

الأسبوع ده كان مختلف جدًا بالنسبالي… شاركت فيها في فعاليات مبادرة “تمكين” الرئاسية داخل جامعة المنيا 

من يوم الاثنين الموافق 27/10/2025 ل يوم الأربعاء الموافق 29/10/2025

تجربة مش بس خلتني أتعلم حاجات جديدة، لكن خلتني أحس بمعنى الدمج الحقيقي، وإننا فعلًا جزء من الكيان الجامعي مش مجرد حضور رمزي 

من أول لحظة في “مهرجان تمكين” كنت حاسة برهبة وتوتر وأنا بتكلم، بس نظرات الفخر اللي شفتها في عيون الناس كانت كفيلة تطمني وتديني ثقة إن اللي بعمله كويس

بعدها الأيام كملت بورشة فنية في كلية التربية الفنية، كانت مليانة طاقة وإبداع وروح تعاون، واليوم الأخير كان في كلية تربية طفولة ، يوم كله بهجة وأنشطة جميلة، منها حاجات للمكفوفين وحاجات للحركي، وكان فعلاً ختام على قد التعب والفرحة 

قد إيه الناس كانت لطيفة من أول العميدة والوكيلة اللي استقبلوني بكل حب وكانوا معايا طول اليوم، لحد الدكاترة اللطاف اللي دعمونا وشجعونا وخلونا نحس إننا قادرين نضيف ونشارك، وحتى الطلبة اللي رحبوا بينا من قلبهم، اليوم كله كان طاقة جميلة بجد 

وشكر خاص طبعًا لكل الدكاترة الأفاضل اللي شاركونا في أيام المبادرة 

وجود حضراتكم معانا كان دعم حقيقي ومعنوي كبير، وكلام وتشجيع حضراتكم خلى كل لحظة في التجربة دي ليها معنى أكبر 

اتعلمت من حضراتكم قد إيه إن الإنسان لما يكون مؤمن بالرسالة اللي بيقدمها بيقدر يسيب أثر في الناس حواليه 

شكرًا على وقت ، وصبر، ومساندة حضراتكم الدائمة لينا وجودكم فرق جدًا وشجعنا نكمل بثقة أكتر 

Hosam Abd Elrahim _ Dr-Yousry Ahmed د-سويسى الظايط _ وليد عبدالقوي _ Mohsen Sayed _ رانيا حسانين عزيز 

وشكر خاص جدًا لـ المصور المبدع اللي قدر يخلد لحظات جميلة من الفاعليات، وصورنا بعدسته بروح حقيقية واحترافية عالية، الصور فعلاً نقلت جمال الأيام دي 

الف الف شكر لحضرتك محمود فايز 

شكر كبير جدًا لـ جامعة المنيا على التنظيم والدعم،

ولـ السيد رئيس الجامعة على تشجيعه الدائم لينا،

ولـ فخامة السيد الرئيس عبدالفتاح السيسي على إتاحة الفرصة دي من خلال مبادرة “تمكين” اللي فعلاً بتمسنا وبتدي أمل حقيقي لذوي الهمم 

تجربة زي دي بتأكد إن التمكين مش مجرد شعار،

ده تطبيق فعلي ومعنى حقيقي بنعيشه 

وحقيقي بتمنى إن المبادرة دي متكونش مجرد فاعلية سنوية، لكن تكون بداية لاستمرار الدمج والمشاركة طول السنة، لإننا مش ضيوف في الجامعة… إحنا جزء منها 

الحمد لله على كل لحظة، وعلى كل مجهود، وعلى كل نظرة فخر شفتها في عيون الناس، الأيام دي مليانة تعب، بس أجمل تعب في الدنيا هو اللي بيخلينا نحس إننا بنحقق حاجة