البلد دي بتاعتنا كلنا

بقلم/نشأت البسيوني 

البلد دي مش بتاعة مسؤول ولا مواطن ولا حزب ولا فئة البلد دي بتاعتنا كلنا بتاعة كل واحد بيحبها بصدق وبيخاف عليها حتى وهو موجوع منها بتاعة الست اللي بتصحى قبل الفجر تعمل أكل لأولادها وبتاعة الراجل اللي بيشتغل بالعافية عشان لقمة شريفة وبتاعة الشاب اللي بيحلم بمستقبل أنضف من اللي شايفه وبتاعة البنت اللي لسه مؤمنة إن الأمل مش اختفى بس مستنيين اللي يصحيه البلد دي فيها الطيب وفيها الغلط فيها اللي بيبني وفيها اللي بيكسر بس برضه فيها ناس بتلم وتصلح وتقول احنا لسه بخير البلد دي مش شوارع وزحمة ومباني بس دي روح وتاريخ ودموع وضحك وصبر وحكايات كتير مكتوبة على جدران البيوت وعلى وشوش الناس الطيبة البلد دي محتاجة مننا كلنا نوقف جنبها مش نتفرج عليها محتاجة إن المسؤول يسمع والمواطن يساعد والإعلام يقول الحق والمثقف ينور والفقير مايحقدش والغني مايتكبرش محتاجة قلب كبير يحتوي الكل لأن مافيش حد فينا أهم من التاني ومفيش بلد بتقوم بيد واحدة المواطن لازم يفهم إن البلد دي مش غريبة عنه دي بيته الكبير واللي بيحب بيته ما يخربوش ما يرميش زبالة في شوارعه ما يسكتش على فساد ما يضحكش على القانون ولا يقول وأنا مالي والمسؤول لازم يفهم إن الكرسي اللي قاعد عليه ما يدومش لكن الكلمة الحلوة اللي بيقولها والعدل اللي بينفذه هما اللي بيفضلوا بعده البلد دي محتاجة ضمير أكتر من أي حاجة تانية ضمير في الشغل في التعليم في المعاملة في القرار في الكلمة اللي بنقولها واللي بنخبيها ولما الضمير يصحى كل حاجة هتتصلح من غير ما نحتاج قوانين ولا شعارات إحنا مختلفين آه بس كلنا لينا نفس التراب نفس الهوى نفس الشمس اللي بتطلع علينا كل يوم إحنا اللي بنفرح لما بلدنا تكسب ونتوجع لما تتعب إحنا اللي ممكن نختلف في الرأي بس عمرنا ما نختلف على حبها البلد دي لو وقعت هنقع كلنا ولو وقفت هنوقف معاها البلد دي مش عايزة كلام كبير عايزة فعل بسيط بس صادق عايزة اللي لما يشتغل يخلص واللي لما يوعد يوفي واللي لما يغلط يعترف احنا محتاجين نحب بعض أكتر ونخف على بعض أكتر ونفهم إن القسوة مش هتبني وإن الأمل هو اللي بيحرك البلد دي بتاعتنا كلنا ومش هتقوم غير بينا بين المواطن اللي بيشتغل والمسؤول اللي بيخدم والشاب اللي بيحلم والست اللي بتربي والطفل اللي بيتعلم يعني إيه بحبك يا مصر خلينا نبدأ من نفسنا خطوة بخطوة كلمة بكلمة عشان نسيب لولادنا بلد تفرحهم مش توجعهم البلد دي بتاعتنا ولو كل واحد فينا حط طوبة صغيرة مكان ما هو واقف هييجي اليوم اللي نبص فيه حوالينا ونقول أيوه إحنا اللي بنيناها بإيدينا