من القوة للبداية الجديدة… وازاي تتولد من الرماد من تاني

بقلم/نشأت البسيوني 

عارف اللحظه اللي تبقى قاعد فيها لوحدك عينك تبص في السقف وقلبك بيقولك كفاية بقى قوم اللحظه دي بالذات هي بداية حكايتك الجديده مش اليوم اللي وجعك ولا اليوم اللي سابك فيه اللي كنت بتحبه ولا اليوم اللي الناس فيه خذلوك البداية الحقيقيه هي اليوم اللي قررت فيه إنك خلاص مش هتسيب الوجع يوجعك تاني أنا وصلت لمرحلة إن الهدوء بقى أعظم حاجة ممكن أعيشها مابقاش يعنيني مين راح ومين جه ولا مين حب ومين خدع أنا بقيت بهتم بنفسي بصحتي براحتى بحاجات بسيطه كده كانت زمان بتعدي زي كوباية الشاي بالليل صوت البحر نسمة الهوا ضحكة عاديه من القلب كنت فاكر إن السعاده محتاجه ناس بس دلوقتي فهمت إنها محتاجه راحة بال وضمير مرتاح السعاده مش في عدد اللي حواليك السعاده في إنك تكون راضي عن نفسك وانت لوحدك أنا كنت دايما بدور على اللي يحبني بس النهارده بقيت بحب نفسي الأول لأني اكتشفت إن اللي ما بيحبش نفسه عمره ما هيعرف يحب غيره صح كل مره كنت بوقع فيها كنت بألوم الدنيا بس دلوقتي لما أفتكر بضحك وأقول هي كانت بتربيني بطريقتها الوجع علمني الخذلان بناني والوحده قوتني اللي كنت بعيط عشانه زمان دلوقتي لما أفتكره بقول الحمد لله إنه مشي بدأت أشوف نفسي بعيون جديده مش ضحيه لأ دي إنسانه أو إنسان عدى من وجع كبير ورغم كده لسه واقف ولسه بيحب الخير ولسه قلبه أبيض دي مش سهله دي معركه اتكسبت بصمت ودموع وليل طويل بقالي مبدأ كده بحبه أوي بقول دايما اللي اتكسر جوايا خلاني أشوف النور كنت بحارب الدنيا دلوقتي بقيت أسيبها تمشي بطريقتها وأنا أمشي بطريقتي ما بقتش أركض ورا حد ولا أزعل على اللي مش شايف قيمتي بدأت أتعلم إن العزله مش ضعف العزله سلام إن السكوت مش خوف السكوت نضج إن البعد مش هروب البعد حكمه بقيت لما حد يبعد أبتسم وأقول هو اختار طريقه وأنا ليا طريقي بقيت أحب الهدوء أكتر من أي كلام وأحب نفسي أكتر من أي وعد كداب أنا بقيت مؤمن إن اللي بيبدأ بعد ما اتكسر بيبقى أقوى من اللي ما اتكسرش خالص لأن اللي اتكسر جرب كل وجع ممكن واتعلم إزاي يعيد بناء نفسه بالطوب اللي الناس رمته عليه دلوقتي لما أقع ما بخافش بفتكر إني وقعت قبل كده وقمت وبقول لنفسي أنا اتولدت من الرماد مرة أقدر أتولد ألف مره بقيت أشوف الجمال في أبسط الحاجات في السكون في النور اللي بيخش من الشباك الصبح في كلمه صادقه في قلب نضيف وفي نفسي لما أشوفها واقفه رغم كل حاجه عرفت إن ربنا دايما بيبدل الخساره بنعمه وبيحول الألم لهديه وإن كل حاجه راحت كانت لحكمه يمكن علشان كنت محتاج تشوف نفسك لوحدك وتفهم إنك قادر حتى وانت من غيرهم أنا مش ناسي الوجع بس بطلت أعيشه بطلت أدي له مساحه جوايا بقيت أضحك وأنا فاكر الأيام الصعبه لأني عارف إن اللي كنت فيه زمان هو السبب إني بقيت إنسان تاني النهارده أنا ما بقيتش أتمنى حاجه ترجع بقيت أتمنى اللي جاي يكون هادي صادق نضيف بقيت أتمنى راحة مش انتقام بقيت أتمنى سكون مش زحمه ناس بقيت أتمنى حب بسيط من غير خوف من غير شروط من غير وجع ودلوقتي لما حد يسألني إزاي بعد كل اللي حصل لسه واقف ببساطه بقول أنا مش واقف أنا اتولدت من جديد اتولدت من وجعي من خيبتي من خذلاني بس بقيت أجمل أنضج وأهدى اتولدت من صمتي من دمعتي اللي نزلت ومن قلبي اللي اتلسع واللي اتولد من النار ما يخافش من الحريق تاني أبدا