الكاتب الصحفي والناقد الفني عمر ماهر
في زمن صار الصوت فيه سلعة، والكلمات بروباجندا، والإيقاع واجب تسويقي، ظهر صوت ما بيشبه كل هالضجيج، لا جاي يرقّصك، ولا يطبطب عليك، بل جاي يحكي عنك… بصوتك اللي سكتّه سنين. من هو؟ من هو اللي قلب الكلام لعب، واللعب وجع، والوجع نغمة، والنغمة نشوة فيها انتقام من كل لحظة بلعنا فيها الغصّة وسكتنا؟ من هو هالفنان اللي ما بيستأذنك، بل بيدخل عالمك، بيشيل الكمامة عن إحساسك، وبيقول لك: "صار الوقت تشطب"؟
اللغز الأول: من هو المطرب اللي ما بيكتب رسائل… بل بيكتب بيانات ثورة؟
"شطبنا لي عصّبنا" مش مجرّد جملة، هيدا شعار داخلي، حالة رفض، حالة نفض لكل شي سكن جواتنا وتعبنا وما قدرنا نحكيه، من هو اللي لما يقول "والنبي لو ضرس عصبنا" بتصدق إنه حاسس بوجعك بالمعنى الطبي وبالمعنى العاطفي؟ من هو اللي عارف إن الضرس مش بس سن… بل شخص؟ شخص إذا ما شلناه، بيضل يوجعنا لعمر كامل.
اللغز الثاني: من هو الفنان اللي ما بيغنّي الحب… بل بيشرّح العلاقة؟
هو ما بيجمل ولا بيغطي، ولا بيخبّي بين السطور، هو بيقول الأشياء بأسمائها، بس بأناقة، بيصرّح بمكنونات القلب كأنه عم يفتح دفتر فحوصات نفسية، من دون ما يخجل، ومن دون ما يجرّح، ومن دون ما يتخبّى، من هو اللي غنّى "رمينا بقا لي في زورنا" مش ككناية… بل كقرار؟
اللغز الثالث: من هو النجم اللي غنّى وجعنا… بضحكة نص نصر ونص انهيار؟
في أغنيته، عم تسمع لحن بيفرفح، بس كلمات بتقطّعك، بتحسّه عم يرقص فوق جرحه، مش لأنّه ناسيه، بل لأنّه صار عنده القوة يفرجيك إنّه فوقه، من هو اللي قدر يجمع الضحك مع الوجع، والنغمة مع الانفجار الداخلي، من دون ما يوقع بالدراما ولا بالاستهزاء؟
اللغز الرابع: من هو اللي ما عاد يكتب للترند… بل الترند صار يركض وراه؟
"شطبنا" ما هي ترند من فراغ، هي حالة، هي صرخة باسم الناس اللي انضغطت، وتعبت، وبلعت وبلعت، وبالأخير… قررت تقطع، تقفل، تشطب. من هو اللي غنّى الانفصال كأنه خلاص؟ وغنّى الإختيار كأنه تحرّر؟ وغنّى البلوك كأنه فن؟
اللغز الخامس: من هو المطرب اللي عنده نغمة… بس وراها رواية؟
كل مقطع بأغنيته بيشبه مشهد، وكل كلمة فيها مرآة، وكل لحن بيعرف إيمتى يفرّحك، وإيمتى يقرصك على جرحك. من هو اللي ما بيغنّي عبثًا، بل بيغنّي عن شي إنت عشته، أو راح تعيشه، أو عم تهرب منه هلّق؟
اللغز السادس: من هو الفنان اللي ما بيعمل شو… بل بيعمل هزّة داخلية؟
وقفتُه، صوته، اختياراته، بتخليك تحسّ إنّه مش مطرب من الموجودين بالمصنع، بل من الناس اللي عاشوا، وطاروا، ووقعوا، وتعلموا من كل سقطة نغمة جديدة. من هو اللي بيسحبك من أذنك، بس مش عالساحة… عالقلب؟
اللغز السابع: من هو اللي لما يقول "اخترنا لي يقدرنا" بتصدق إنه اختار بعد دم؟
الاختيار مش كلمة، هو تاريخ، هو خيانة صار بدالها كرامة، هو وحدة صارت بدالها راحة، هو ندم صار بداله قناعة. من هو اللي كتب الغنية مش لأنه شاعر… بل لأنه عايش القصة من ألف زاوية، من أول حب لآخر تنهيدة؟
اللغز الثامن: من هو اللي عارف إنه "العسل" مش طعمه… بل مفعوله؟
"ولي بعسله مسكرنا" هيدي مش صورة شعرية، هيدي حقيقة عاطفية، بتغرقك بلسانك، بتنسى مين أنت، بتدوّب لأنك بدك تنحب، مش لأنك مرتاح. من هو اللي قدر يوصل لكل واحد منا وقال له: ما تغلط تاني… سَكّر الباب.
اللغز التاسع: من هو الفنان اللي حطّ الحب عالكرسي… وحقّق معه؟
ما عاد يتغزّل، ما عاد يترجّى، ما عاد يبرر، بل قرر يسأل، يحاسب، يشطب، يرمي، يخلع. من هو اللي قالها بالفم المليان: "وجعنا لنخلعه خلع"، وما تراجع؟
اللغز العاشر: من هو المطرب اللي كل غنية إله… بتشتغل فيك بعد ما تخلص؟
مش بس بتغنيها، بتعيشها، بتفتكرها، بتوصلك بعد ساعات، يمكن بعد يوم، يمكن فجأة بتسمع كلمة منها وإنت بموقف… وتحسّ إنك فهمتها متأخر. من هو اللي كلماته ما بتنتهي بنهاية الأغنية… بل بتبلّش فيك بعدها؟
اللغز الأخير: من هو الفنان اللي إن سكّرت الميوزك… بتضلك سامعه جوّا؟
بتسكر السماعة… بتقعد ساكت… فجأة تلاقي حالك عم تتمتم: "شطبنا لي عصّبنا"، فجأة تضحك لحالك، مش لأنك مبسوط، بل لأنك أخيرًا قلتها، حتى لو بصوت غيرك. يمكن الجواب واضح… يمكن محفور بقلبك من زمان.
يمكن… الجواب بنجم بتعرفه يبدأ إسمه بالحرف إ...ن
تعليقات
إرسال تعليق