كتب/ أيمن بحر
بالبلدى كده وعلشان كل الناس تفهم
افتتاح سد النهضة فى سبتمبر الجاى فى حقيقية تانية بتتكشف بهدوء وفى محاولة واضحة من أطراف كتير للتغطية عليها
فى هذا المقال هتفهم إزاى إثيوبيا نفسها اتحشرت فى الزاوية… وإزاى مصر كسبت الجولة من غير ما تضرب طلقة!
المخابرات فوق جسم السد!
يوم ١٤ مايو ٢٠٢٤ رؤساء مخابرات ١٠ دول أفريقية زاروا سد النهضة. إثيوبيا رتبت الزيارة عشان تقول للعالم: السد اتبنى وخلاص… والافتتاح فى سبتمبر.
لكن الصور الفضائية لا تكذب كشف لقطات حديثة للسد عن مفاجأة بيتم طول الوقت إخفاءها بالدعايا والتضليل نشرها د. عباس شراقى طلع قال: الجسم الإنشائى صحيح خلص، بس التشغيل؟ صفر!
التوربينات مش شغالة مفيش كهربا والمية بتتخزن بدون فائدة
وهتتصرف بدون فايدة
التوربينات؟
مش شغالة!
صور الأقمار الصناعية بتقول إن ٧ توربينات اتركبوا… بس مفيش ولا واحد شغال بشكل منتظم. ليه؟
أنفاق المية فيها تسريبات.
الطمى سادد مداخل التوربينات.
يعنى السد حرفيًا مش بيولّد كهربا… وده معناه: لا تنمية لا استثمارات لا فوايد دين مدفوعة… وإثيوبيا اتأخرت عن سداد ٣٣ مليون دولار من ديسمبر ٢٠٢٣!
السد اللى اتبنى غلط!
من ٢٠١١ قالوا هنركب ١٥ توربينة… بعدها زودوهم لـ١٦… بعدين قللوا لـ١٢… والنهاردة فى ٧ ومنهم ٢ بس اللى بيشتغلوا ساعات.
كانوا بيقولوا هينتج ٦٠٠٠ ميجاوات… النهاردة ما بيطلّعش ٥٠٠!
كل ده لأن التصميم أصلاً فيه عيوب وإثيوبيا اعترفت بده رسميًا فى ٢٠١٨.
بس المشكلة مش هنا
… الأسوأ إن عدم تشغيل التوربينات خلى في أكتر من ٦٠ مليار متر مكعب مية محبوسة… لازم يتصرف منهم ٢٠ مليار قبل الفيضان يعنى تلت المخزون، وإلا…
السد هيغرق… أو السودان هيتضرب بفيضان مدمر!
إثيوبيا تحت ضغط المية!
موسم الأمطار بدأ والتوربينات مش شغّالة. البوابات اللى ممكن تصرف المية بأمان محتاجة ٣ شهور تفريغ
لكن الوقت ضاع بشكل متعمد غالبا
ولو اتفتحوا البوابات العليا مرة واحدة؟ هتبقى فيضان غير مُنظم على السودان.
وكأن إثيوبيا طالما فشلت فى تشغيل التوربينات وتمرير المياة من خلاله قررت تحتفظ بالمياة عشان تبتز بيها دول المصب دون تنسيق أو إخطار أو مشاركة فى البيانات
وإن السد مش وسيلة تنمية ولكن سلاح ابتزاز طالما معرفناش نعطشكوا فى الملء هنحاول نغرقكوا في الفيضان!
طب ليه مصر ساكتة؟
ناس كتير سألت: ليه مصر ما ضربتش السد؟ ليه سايبة آبى أحمد يحتفل؟
الحقيقة؟
مصر مش محتاجة تضرب… لأنها ببساطة: حسبتها من بدرى.
٣ محاكاة ذكاء اصطناعى أجمعوا إن مصر تقدر تضرب السد وتفرغه من غير ما تهد جسمه
بس المشكلة مش فى القدرة العسكرية المشكلة فى القرار السياسي.
!مصر قررت تلعبها صح: سابت السد يغرق نفسه بنفسه.
آبى أحمد… ليه بيغامر؟
الوضع في الداخل الإثيوبى بيغلى!
حرب شغالة فى أمهرة مع ميليشيا فانو
اشتباكات فى أوروميا
اقتصاد منهار وديون مُتعثر فى سدادها ومجاعة بتدق الأبواب
والسد؟ مش شغال!
من هنا أبى أحمد محتاج انتصار دعائي
فبيفتح السد فى الإعلام حتى لو مفيش كهربا خارجة! عاوز يقول لشعبه كسبنا المعركة ويشد المستثمرين بأي تمن.لكن على الأرض… السد مجرد شلال صناعى متوسط الحجم ناقصه مفتاح تشغيل.
فشل فى توليد الكهربا.. فشل فى منع المياة عن مصر ضيع فلوس الإثيوبيين فى جسم خرساني لا يولد ايرادات
وكمان هيفشل فى استخدامه كورقة لإغراق مصر
الفيضان ورقة ضغط سياسية؟
آه، ممكن آبى أحمد يكون بيهدد مصر والسودان مش بالعطش… لكن بالفيضان!
كل ما يتأخر في فتح البوابات، المية هتزيد… والتصريف العشوائى هيبقى مدمر. ومن غير أى تنسيق ومن غير ما يشارك بيانات… ده اسمه تهديد ناعم!
لكن مصر كانت مستعدة… شغالة من بدرى على مشروع مفيض توشكى واللى يقدر يستوعب كميات المية الزيادة ويحول الفيضان لفرصة.
مصر كسبت من غير طلقة!
لو كانت مصر ضربت السد، كانت أدّت لآبى أحمد ذريعة يتباكى بيها قدام العالم ويقول: مصر ضد التنمية.
لكن دلوقتى؟
الكل شايف الحقيقة بعينه…
سد مش شغال
كهربا مش بتتولّد
اقتصاد غرقان
مياه بتتهدد بالفيضان
ومصر؟ جاهزة ومستعدة ورايقة… سايبة آبى أحمد يغرق فى مشروعه ويقف على حافة ورطة هو اللى حفرها بإيده!
الخلاصة:
مش كل المعارك بتحتاج طلقة… وأحيانًا أذكى رد هو إنك تسيب خصمك يغرق نفسه.
وسد النهضة؟
اتحوّل من ورقة ضغط على مصر… لقنبلة فى وش إثيوبيا.
وآبى أحمد؟
رايح يفتتح أكبر فشل هندسى فى تاريخ إفريقيا… والفيضان اللى ناوى يلوح بيه؟
مصر حاطاله صرّاف آمن… ومستعدة لأى موجة جاية
تعليقات
إرسال تعليق