بقلم/أيمن بحر
السرورية تضرب من جديد فانتبهوا
يا عقلاء مصر والسعودية... فوقوا قبل ما المركب تغرق!
فيه ناس شغلتها الوحيدة إنها تولعها بين البلدين ! واحد يكتب منشور مسموم يقولك: السيسى بيتسول من السعودية والتانى يرد: السعودية اتحلبت من ترامب! طب هو انتوا مش واخدين بالكم إنهم بيحاولوا يشقوا الصف ويكسروا المحبة اللى بين الشعوب والقادة؟
دى مش غيرة... دى خيانة!
الموضوع مش محتاج فهلوة الموضوع محتاج وعى.اللى بيقول إن مصر بتتسول نحب نفكره إن السعودية نفسها قالت أكتر من مرة إن دعمها لمصر واجب وشرف مش منة ولا تفضل.وعلى الناحية التانية اللى بيقول إن ترامب حلب السعودية نحب نفكره إن الاتفاقيات دى جزء من السيادة السعودية اللى محدش يقدر يعترض عليها وإنها كانت تخدم مصالحهم واستقرارهم وأمنهم.
إنتم مش شايفين إن كل ما تتقرب مصر من السعودية يظهرلك واحد مجهول على تويتر يحاول يولّع الدنيا؟
مش ملاحظين إن أى خطوة تقرب بين السيسى ومحمد بن سلمان يطلع حد يعمل فيديو عشان يشتم أو يشكك؟
طب ليه؟ علشان الناس دى عايزة المنطقة كلها تولع!
بيكرهوا إن الشعوب تبقى على قلب واحد، وخصوصًا مصر والسعودية ومعاهم الشقيقة الغالية الإمارات
لأنهم الأعمدة الأساسية للأمن العربى.
الموضوع باختصار إنهم بيحاولوا يشقوا الصف بين مصر والسعودية بكل طريقة... مرة يشككوا فى النوايا، مرة يفسروا الدعم على إنه تسول ومرة يقولوا إن السعودية بتتبع أمريكا ومرة يقولوا إن مصر بتبيع نفسها... وكل ده كذب فى كذب!
يا مصريين... يا سعوديين... انتبهوا اللى بيحاولوا يولعوا بينكم لا بيحبوا مصر ولا بيحترموا السعودية.
خليكم ورا قيادتكم... حافظوا على اللى اتبنى بدم وتعب.اللى بيحاولوا يفرقونا هما نفسهم اللى كانوا بيتمنوا سقوطنا!
فبلاش نكون أدوات فى إيد أعدائنا.
وخلوا بيننا دايمًا كرامة عقل، ومحبة
وقولوا بصوت واحد:
مصر والسعودية... يد واحدة ما تتكسرش!
تعليقات
إرسال تعليق