على الدوام لازم تحمي نفسك من الغرق في الأوهام...
كان لازم تتعلم العوم في بحر الدنيا الغدار يا طيب ..علشان بفكرك متضلش طريقك وتغرق.
انت عظيم بس في عيون الناس إللي بتحبك
هايل في عيون إبنك وبنتك.
أجمل إنسان في عيون عشقاك...
غير كده متتوهمش ..
هي لا كانت وقفت قبلك على حد ولا هتقف بعدك!
يا مُتصَدِر انت نسخة مملة التكرار للأسف لا فريد من نوعك ولا أذكى إخواتك زي ما عقلك القاصر دَلَك!
دول سبعة مليار نسخة على وش الأرض وأكتر ...غير إللي قابلوا رب كريم قبلهم كام ضِعْف منعرفش!
كان فيهم ناس مدهشة جداً وعملوا إللي ميتعملش‼
يوووه متعدش يا طيب علشان متتعبش...
يا تعباك ذاتك وبلاش نقول غرقان في ملذاتك يمكن ماحصلش.
الحقيقة بتشبه فيلم أبيض واسود بنتفرج عليه للمرة الألف .
معروف بدايته ونهايته وبنضحك على نفس المشاهد المكررة لحد ما عيونا تدمع‼
يا عاجز بدون العون من الله... العُمر قصير ولو يطول كفنك متفصل وجاهز...
أيوه انت وكبير جداً ومستني علامة تليق بمقامك علشان تدهش الخلق بكينونتك الهشة ..إللي هما أصلاً زيهم زيك بنفس الضعف والنقص!
آخرك..صورة بهتة على جدار بيتك ده إن فِضل على حاله وعليها علامة سودا ويمكن يتكتب عليها إسمك‼
آه والله يمكن إن وجدوا قلم!
وإللي كانوا بيمدحوك يا متفرد هينقسموا نصفين للأسف جزء هيقول ما يجوزش عليه إلا الرحمة وجزء هيسِبْ ويلعن سواء في السر أو العَلن ودعواته هتقل راحتك وهتقلق نومتك!
شوف انت شايف نفسك فين وانت في الحقيقة محتاج نظارة بعمق كبير تقرب البعيد وتكشف طريقك وسكتك.
الغرض من الكلام والقصد عِلمك النافع وعملك الطيب ودعوات الناس الطيبين وبِر والديك هو ده بس إللي نافعك وقاعدلك.
عَمَر في الأرض من غير ما تتَكَبُر...
لو كلامي ضايقك معلش..الحقايق دايماً مُرة
لكن المواجهة بها أفضل وأنا بواجه نفسي قبلك يمكن أتغير وفكري يتطور.
الغرض من الكلام والقصد...
دي كانت كُل وجهات النظر.
بقلم
وحيد صبري
تعليقات
إرسال تعليق