بقلم د.منار عبد الهادي
يمكن وقتها مكنتش فاهمه ان اللقا مهما طول قصير
الموت مش بيفرق
مبينقيش
مش بيختار البعيد عن عينك او قلبك ويسيبلك اللي بتحبه
الموت بيصيب قلب الحي ويرحم الميت
عارف
مش كل الموت موت
في موت بيتدفن فيه الميت تحت التراب
وفي موت بيتدفن فيه الميت فالنسيان
مش كل الميت منسي
ومش كل المنسي ميت
الكلام شكله ملخبط بس كنت محتاجه اتكلم معاك بس انت ....ميت
موت جوايا من قبل اخر فراق
مكدبش عليك
بكيتك يومها بحرقه
شهقة الوداع خرجت بروحي
كالعاده
الكون بيضيق والتفاصيل بتوسع
النفس بيضيق
والبكا هو بس اللي بيساعك
اخر مره واحنا فالسينما
رفعت راسي من علي كتفك في عز الضلمه وسألتك
(تفتكر هينفع نرجع زي الاول؟)
وقتها سيبتك ترد عالسؤال
لمعة عنيك فالضلمة وانت بتقولي هنرجع خلتني ارجع راسي علي كتفك وانام
عارف
السؤال ده يمكن السؤال الوحيد اللي اترد عليه ب تلات اجابات
هنرجع
مبقاش ينفع نرجع
كان عندِك حق لما قولتي معدش ينفع نرجع
دلوقتي بقول ان الغلط كان فالسؤال مش فالاجابه
في اسئلة كده يوم ما تسئلها تعرف ان الاجابه مش اجابه عالسؤال اللي اتسأل
الاجابه اجابه علي كل الاسئله اللي متسألتش
يعني مثلا مثلا
السؤال مكنش تفتكر هنرجع زي ما كنا
الاسئله كان المفروض
هي دي اخر مره هشوفك فيها ؟
طب هو احنا ممسكناش فبعض ليه؟
حبيتني ولا كنت استجمام استراحة بين حربين ؟
هشوفك تاني ؟
طب لما توحشني ....هعمل ايه ؟
طب هتبقي كويس يعني ؟
كان ليه من البدايه نوصل لحد هنا لما احنا هنلف ونرجع كل واحد من طريق ؟
مش نصيب متجيبهاش في النصيب الاتفاق كان مالاصل صدق ...قدرت تصدق لحد فين ؟
تفتكر
هنرجع
زي الاول ....ولا الاول مالاول كان رجوع ؟
الفيلم خلص
النور نور
بس الغريب ان الدنيا ضلمت
بقلم
د.منار عبد الهادي
تعليقات
إرسال تعليق