البعد

بقلم/ أيمن بحر 

البعد والانقطاع عن شخص بتحبه لفترة طويلة بيبرد مشاعرك غصب عنك ..

زمان قالوا البعيد عن العين بعيد عن القلب

مكنتش بقتنع أوى بالجملة دى .. بس فهمتها مؤخرا ..

رغم إن المشاعر ممكن تفضل موجودة ومكان الشخص جواك بيفضل محفوظ .. ٱلا إنه بيحفر بإيده فجوة عميقة تحيل ما بينكم ..

البعد بيحفر جفا و قسوة .. البعد بيشق الحلم لاتنين .. والروح لاتنين .. والطريق لطريقين متوازيين مبيتلاقوش فى ولا نقطة ..

البُعد سلاح الحب اللى بينزل على لهفة مشاعرك يقتلها بسكينة تِلمة وباردة ..

البُعد المقصود اللى عن عَمْد بيحوّل مشاعرك لإزاز قابل للكسر وجرح أى حد حواليك بدون قصد ..

البعد بيخليك تفقد قدرتك على البكا .. لإنه بيستنفذ كل الدموع المهدورة فى أول أيام الفراق اللى بعدها بتحس إنك خلاص .. خلصت دموعك وعيونك جفّت ..

البعد قنبلة صامتة موقوتة بتمحى كل الحجات الحلوة اللى جواك بالتدريج ..

البعد عن حد بتحبه بيديلك كل يوم ضربة توبيخ على إنك علقت نفسك بشخص كان فى إيده يبقى معاك .. بس اختار البعد واختار يقتل مشاعرك وانت عايش ..