كتبت د/ نجلاء هاشم
حدوتة بلدنا النهاردة جميلة وتقريباً كلنا عارفين إن مصر مليانة بالقصص الكتيرة والحواديت بس الحقيقة مش مجرد أساطير وقصص ملهاش أصل عندنا ووهميه ، لا ابداً كلها كانت موجودة بالفعل ، تعالوا النهاردة نرجع بالزمن لورا شوية لا شويو كتير..
التراااام فى مصر وحكاية "السنجه" اللى كانت كل شويه تقع والسواق ينزل يجبها .
سنه،(1892) كانت شوارع مصر غير ممهدة وغير مضاءة إلا القليل منها زى الشوارع الرئيسية والكبيرة فقط، والمواصلات كانت عبارة عن الحمار او "العربة الكارو" وكانت ليها مواقف عند فندق شبرد بشارع الجمهورية، وكانت عربية السوارس أيضاً وسيلة مواصلات ولكن اغلى سعراً، وكان الناس تعانى من أخلاق العربجية ومن أستغلال الحماريين ليهم لأن الإنتقال كان بالنهار فقط، أما ليلا فكانت الشوارع مظلمة ، وكل شارع في عزلة تامة عن الشارع الاخر.
ولذلك اصبحت كلمه "عربجية " الآن تعنى سوء الاخلاق، وبدأ التفكير من هنا فى إنشاء فكرة الترام سنه (1892) وخلال سنه وافقت الحكومة المصرية في نوڤمبر (1893) على منح إمتياز الشركة البلجيكية على إنشاء ترام سكة حديد .
في البداية تم إنشاء 8 خطوط، بداية 6 خطوط كان مركزها ميدان العتبة ومنها القلعة وبولاق و الناصرية و العباسية والروضة ومصر القديمة، اما الخطين الاخرين يبدأ منها الشاطىء المقابل إلى النيل متجه الى الجيزة، والاخير يبدأ من ميدان قصر النيل متجه الى قطارة الليمون .
وفى الـ 10صباحا من اغسطس عام 1896 قامت الشركة البلجيكية بتجريب قطار الترام لأول مره في تاريخ القاهرة، انطلق من بولاق مروراً بالعتبة حتى وصل إلى القلعة من خلال شارع محمد علي، وعلى طول هذه المسافة وقف المصريين على الصافين عشان يشوفوا معجزة العصر الجديد، وكانت الاطفال بتجري ورا الترام يرددوا كلمة "العفريت اهو". وقامت جريدة المقطم ودي كانت جريدة مشهورة جدا في الوقت ده بوصف عربة القطار انها تسابق الريح.
وبعد مرور11 يوم على التشغيل الرسمي للترام احتفلت الشركة في مقرها ببولاق بحضور الوزراء وكبار رجال الدولة وسفراء الدول، واصبحت الصحف تكتب عن الاختراع الرهيب اللي بيشتغل بالطبيعة .
وفي سنة 1903 قامت الشركة البلجيكية بردم الخليج المصري، ومد الترام من السيدة زينب الى غمره ، وكمان تم إنشاء خط اخر يمتد من ميدان باب الحديد الى كوبرى شبرا وشارع شبرا، وبيتفرع بعد كده خط اخر إلى ساحل روض الفرج.
وبعد إنشاء كوبرى الملك الصالح وكوبرى عباس تم إنشاء خط من الجيزة الى العتبة مباشرة، وفي سنه 1912 سنه تم تمديد الخط الثانى المباشر من العتبه الى الجيزه مرورا بكوبرى أبو العلا .
وتم تمديد خط القلعة الى الإمام الشافعى وخط أبو العلا الى روض الفرج، وبعد كل هذه التوسعات فى خطوط الترام أصبحت هى الوسيلة الأولى والرئيسية فى الانتقال، وبعد العزله اللي كان بيعيشها اصحاب كل حى بفضل الترام بدأ كل حى ينتقل الى الاخر بكل سهوله، وبفضل وجود الترام تم بناء الاحياء الجديده مثل الزمالك ومصر الجديدة، والإعلانات عن الشقق بدأت ترتفع لوجودها جانب الترام حتى وصلت الى 60جنيه للإيجار.
وطبعا كانت الحماريين والعربجيه ضد هذا المشروع تماما، مش بس كده هما كمان حاولوا ينشورا الاشاعات علشان الناس تخاف تركب الترام، ومن اشهر الاشاعات كانت "اوعى تركب الترام احسن الكهربا تفرمك "واستغل بعض النصابين طيبه المصريين وكانوا بيحاولوا يقنعوهم ان ممكن حد يشترى الترماى، وفعلا فى حالة نصب حصلت وباع احد النصابين الترماى لواحد من الصعيد، اللي انبهر لما شاف الزحام فاعتقد انه ممكن يكسب كثير من الفلوس، وفعلا اشتراه من النصاب واكتشف بعد كده انه اتنصب عليه، وانتشرت بعد كده جملة "احنا اللي بعنا الترماى".
قصه الترام عاشت اكثر من 100 سنه وبعد كده اختفى، مع انه كان بطل تحويل القاهرة من العاصمة البدائية إلى العاصمة الحديثة اللي إتكلم عنها التاريخ.. ودى كانت حكاية بلدنا النهارده.. ومع حكاية جديدة الاسبوع الجاي.
تعليقات
إرسال تعليق