قصيدة مطلوب فصيلة دم عربي

مطلوب فصيلة دم-عربي

من يومين وقعت أمي

على الدكاترة طلعت أجري

دكتور يقولك: دى مقاومة

ودكتور يقول: محتاجه نقل دم

فوري.. 

روحت مستشفى كبيرة

قالوا عنها جامعة دمي.. 

فيها كل الفصايل 

فيها أصلي وفيها فصلي.. 

ردت وقالت بانكسار 

فصيلة نادرة للأسف

كنا بندور عليها 

لما انقسمت السودان 

وليبيا وسوريا الجميلة

ولا غزوة العراق... 

ولا اقولك ناشد حقوق القبيلة

يمكن تلاقي عندهم تلك الفصيلة

أى طير من اللى هاجر يمكن تلاقي

بالمخازن والتلاجات.. 

ردت حقوق القبيلة.. 

المشكلة لا فى المريض ولا فى العلاج

المشكلة ان المشكلة تشخيصها 

نفسي.. 

يعنى ايه تبقى الجثث علو الجبال

الإبادة ليل نهار والمساومة على أرضي

ونفسي...

بس طبعا انت فاهم 

منقدرش نديلك إفاده أو شهادة 

بشكل رسمي.. 

يا عالم  أمي مريضه

اعمل ايه ومعدش فاضل 

غير يدوب كعبة شريفة وأهرامات..

من زمان العين عليهم

 سبب اللى جاي واللى فات

عرفت تفرق شملنا وانشغالنا بنفسنا

سرقت شبابنا مننا حتى ايمانا بربنا

.......... 

مطلوب فصيلة دم عربي 

فصيلة نادرة وللأسف 

معدش منها فالوجود

خريطة كاملة اتغيرت

واتقسمت.. معدش باقي غير 

حدود 

مش هقولك كانوا ايه واحنا ايه 

مش هقولك عالتاريخ

وحدودنا كانت من فين ل فين

ولا استغاثة معتصم والفعل ايه.. 

الصراع طول عمره سلطه.. 

والخلافه تبقى لمين؟!! 

عدت علينا كل الفصول

الخريف والربيع وكل مرة

نقول آمين.. 

العروبة مش لغة

ولا شعوب متفرقه

دا حلم عشناه كلنا

محتاج أكيد اننا

نذكر دايما بعضنا

لا ننسى أبدا أصلنا

ولا وحدة لسنا وأرضنا

بحبل ممدود للسما

وعضو واحد لو اشتكى

يتأثر كل الجسم بيه

........ 

مطلوب فصيلة دم عربي

بقلمي محمد جلال