لملم جراحك جوا روحك
إختفي و انت بتفرفر
غضبك من جحيم النار
خلاص هايصفي بس اصبر
كانت تجربة قاسية
و الدرس مسّخ و مرّر
و النتيجة في النهاية
نقص الفرحانين واحد
زاد المحزونين واحد
رب العباد كان شاهد
الدرس دا أصعب مقرر
و اختصار اللى حصل
الغدر بالدم إتصل
احتل كل الأوردة
الوفا رفض العمل
و العلاج بعده تعذّر
الدم فاير بيغلي
خسارة اللى كانوا أهلي
لمّا نور صُبحي ندهلي
كرهوا صوته ، هربوا منّي
عملوا غير ما كنت أفكّر
أنا و الزمان بينّا اتفاق
قرار مثبوت على الأوراق
مضينا ، بصمنا و نفّذنا
لو اتهجرنا .. لابد نهجر
مستحيل للخلف نرجع
مستحيل للباعنا نسمع
و لو يوم كان العشم أخضر ،
نِشف صَدّة بعد صَدّة
فطمنا روحنا عن المودة
الوِدّ زرعه مال و صفّر
صبح الضحك كدّاب
نظرة العين كدّابة
الدفى في اللمة كدّاب
طعم اللمة خلاص اتغير
أمرّ من الصبار
بعد ما كانت سكّر
- صباح الخير يابروتس
- صباح الزيف يا قيصر
الطعنه هاتيجي من خنجر
بيُقطر غدر و خيانة
ياروما ياجاحدة و جبانة
غدرتي ظلم بالقيصر
بكرا الظلم راح يغرس
في صميم القلب طعناته
بكرا ياروما راح تهرس
تروس الظلم أركانك
و عمدانك .. هاتتكسّر
بكرا تبكي على يوليوس
و يفيض بالدمع وجدانك
يوليوس مش مات من الطعنة
وجع الغدر كان أكبر
بروتس مستحيل يملك
صولجان الحكم في روما
بروتس أخره يتمنظر
بريشة العزْ على صدره
و حتى الريشة كدّابة
و لونها حتى مش دهبي
لونها رمادي متعفّر
موجودة بس في خياله
سيريالي الفكر يابروتس
و تغابى وقت ما فَكّر
حديد القلب يايوليس
خمسين طعنه في جسمه
الدم كأنه في المجزر
و لسه برضه كان واقف
وقفة سبع في عرينه
عليه بينادي و بيزأر
الحقني تعالى يابروتس
اسند ضهري ياصاحبي
أنت الفارس الأمهر
كان قدّامه أعدائه
و بروتس وحده في ضهره
ماكانش يظنّه راح يغدر
يوليوس كان بيقوم
زي الموج كان يُهدُر
بروتس طعنه في ضهره
أه من قسوة المنظر
طب كنت طعنت في صدري
يمكن ياصاحبي لو شوفتك
كنت من قلبي طلّعتك
و حبي ليك كان اتغير
و قبل ما اموت على حبك
كنت فهمت و كرهتك
مش تقتلني و أنا لسه
في عيني شايفك الغالي
و اسمك لسه ما اتغير
رخصت و هنت في عينك
و انت الغالي يابروتس
و كانت طعنتك ليّا
آخر طعنة في القيصر
#شحاته_على_ابودرب
تعليقات
إرسال تعليق