فيلم ومسلسل دراما استهداف الجيش المصرى
كتب سمير الشرنوبي --------------------------
ناس كتيرة فهمت من مقالنا اللى فات . ان مصر خلاص ماعادش عندها اختيار ..
وإن التحركات من كل الاطراف معناها إننا داخلين الحرب بكرة
الكلام ده صحيح ومش صحيح فى نفس الوقت .. بس علشان نفهم ازاى .. لازم نشرحها واحدة واحدة
علشان نفهم يبقى لازم نرجع بالزمن شوية .. لما الجيش المصرى سطر بطولة ، بل معجزة العبور العظيم .. وعلّم على جيش الاحتلال والجيش الاميريكى ... و أعطى الجميع درس بما فيهم الروس فى كيف يمكن أن ينتصر المقاتل المصرى ....
وبعد مادخلنا مفاوضات السلام واستعدنا الأرض
فضل جرح العبور ده عندهم زى ماهو .. جرح غائر جدا .. وعلشان كدة كان لايمكن القبول بتكراره ، وبالتالى لا يمكن القبول باستمرار الكيان ده اللى اسمه الجيش المصرى زى ماهو .. لأنه هيفضل هو الصخرة اللى بتتحطم عليها كل محاولات إسقاط المنطقة ...وعلشان كدة كان لابد من اسقاطه .. أو تدميره
فضل جرح العبور ده عندهم زى ماهو .. جرح غائر جدا .. وعلشان كدة كان لايمكن القبول بتكراره ، وبالتالى لا يمكن القبول باستمرار الكيان ده اللى اسمه الجيش المصرى زى ماهو .. لأنه هيفضل هو الصخرة اللى بتتحطم عليها كل محاولات إسقاط المنطقة ...وعلشان كدة كان لابد من اسقاطه .. أو تدميره
المحاولات دى بدأت من زمان ... من الثمانينات .. لما كان بيتم تحجيم قوته .. وتحجيم السلاح اللى بيوصل له سواء من حيث الكميات او الأنواع .. وكان التصور عندهم ، ان ده قادر يحجم قوة الجيش المصرى ..
لكن ده ماحصلش ..
ثم جاءت حرب تحرير الكويت علشان ينضم الجيش المصرى للتحالف الدولى
وكان الهدف هو وضع الجيش المصرى فى الخطوط الامامية لمواجهة الجيش العراقي .. ويبقى الجيش المصرى والعراقى يخبطوا فى بعض ويخلصوا على بعض ... وفهم الجيش المصرى اللعبة . ورفضت قيادات الجيش ده ... وقالوا ان مهمتهم هى تحرير الكويت فقط وليس ضرب الجيش العراقى ...
وده اللى حصل بالفعل حيث قام الجيش المصرى بفتح خط الألغام وعمل ثغرة فى خطوط الدفاع على الحدود الكويتية ... دون التورط فى تدمير الجيش العراقى .. اللى انسحب من أمام الجيش المصرى .. ودخل الجيش المصرى وعمل حاجز بينه وبين قوات التحالف .. ولم يتقدم ناحية الحدود العراقية أبداً
وتيجى فى التسعينات المناورة بدر علشان تكشف قوة الجيش المصرى وتطور تكتيكاته وتدريباته برغم الميزانية المحدودة ... وده جنن الغرب .... وأرعبهم ..
ومع مجيئ الالفينات .. واحداث 11 سبتمبر .. طلبت بلاد العم سام من مصر تغيير عقيدة الجيش المصرى ... علشان يبقى العدو هو الارهاب
بدل العدو الصهيوني ... وتم رفض الطلب ده جملة وتفصيلا !!
ثم تأتى أحداث 2011 والربيع العربى ليتحول الامر من ثورة على النظام الى إسقاط ما إصطلح على تسميته بالحكم العسكرى زى ماتم إقناع المغيبين .. علشان يتفاجئ أصحاب المؤامرة بهتاف المصريين فى الشوارع "الجيش والشعب إيد واحدة"
فــ يتم تأجيل المخطط مؤقتا ، حتى وصول الإخوان للحكم .. واللى كان بــ يتم الدفع فى إتجاهه بمنتهى القوة !
ويصل الإخوان للحكم .. ويبدأوا التامر على الجيش لأن ده كان الهدف الرئيسى من وصولهم للحكم .. فتبدأ المؤامرة من أول محاولة إدخال الإخوان للجيش واللى رفضه وزير الدفاع وقتها
الفريق عبد الفتاح السيسى .. ومرورا بمحاولات استعداء الشعب على الجيش وهتافات يسقط حكم العسكر .. ثم وصولا لمؤتمر نصرة سوريا اللى كان هدفه إرسال الجيش المصرى للقتال فى سوريا ضد النظام السورى . علشان يسقط فى مستنقع حرب العصابات هناك ضد المليشيات ويتم استنزافه وتدميره
. وهو مارفضه وزير الدفاع وكل قيادات الجيش
وقامت 30 يونيو ..وبدا واضحا للجميع انه مافيش بديل عن تدمير الجيش المصرى للاجهاز على مصر .. ودخل الجيش المصرى فى حرب مستعرة مع منتخب العالم للارهاب ..على كل المحاور الاستراتيجية فى مصر فى الشرق والغرب والجنوب ..قتال شوارع وحرب عصابات
ممتدة بتمويل دولى لا متناهى .. وبرغم سقوط الالاف من الشهداء الابطال من جيش وشرطة مصر .. الا ان أبطال مصر انتصروا نصرا مؤزرا .. وتم تبييض الحدود الغربية ..وتم تطهير سيناء من كل بؤر الارهاب ..لكن تفضل الحرب مستعرة فى مثلث رفح والشيخ زويد بشكل مكثف ومستميت لعدة سنوات لحد 2021
لما تم تطهيره من الارهاب تماما !!
وبالصدفة يا أخى ... وانتوا عارفين الصدف دى طبعا ... إن المثلث ده هو اللى بعد كدة تم طلبه والضغط على مصر فيه لتنفيذ مخطط التهجير بعدها بكام سنة فى 2023 .... شوف يا أخى الصدف ...
طب وبعدين .... هو جيش مصر ده يعنى مالوش حل والا اييه !؟؟
لازم يتورط فى اى مصيبة ... وعلشان كدة .. بالتوازى مع معركة الارهاب .. كان لازم الجيش يتسحل فى اى صراع !
يالا بينا عاصفة الحزم ... وهاتوا الجيش المصرى يحارب فى اليمن .. والجيش المصرى رفض ...
طب يلا بينا تحالف اسلامى دولى علشان نروح نلعب برنامج من سيربح المولوتوف فى سوريا
ويتم بالفعل إعلان اسماء الدول المشاركة فى التحالف ده والمتضمن مصر .فتطلع مصر ببيان رسمى تنفى انضمامها لأى تحالفات عسكرية وإن الجيش المصرى مش هيروح يحارب برة أرضه ! فالتحالف يبوظ
طب يالا بينا بقى تحرش بجيش مصر فى شرق المتوسط ومحاولة الاستيلاء على مقدرات مصر و ثرواتها البحرية
ونشوف استعداء رهيب من الأتراك ضد مصر مع حملات اعلامية مكثفة لاستفزاز الجيش المصرى والتقليل منه فى نفس ذات الوقت وتطلع تريندات جيش المكرونة وعقيد مقاتل خط الجمبري ... الخ الخ .. والجيش المصرى فاهم اللعبة ... وثابت ومتنمر .. وبيعمل ضربات بمشرط جراح تقطع صوابع اللى يقرب من اراضى
وخيرات مصر ... فــ ماحدش يقدر يقرب ..
طب يالا ليبيا بقى ونهدد حدود مصر ... ويفضل الجيش المصرى صامت .. ويرفض الانزلاق فى صراع إقليمي ضد مليشيات مسلحة لكن وقت الجد كان بيتدخل بمشرط جراح علشان يقطع عرق ويكوى الجلد "وبالشفاء ان شاء الله" .. فيضرب درنة ردا على قتل ابنائنا المصريين
ويساوى قواعد الإرهابيين بالأرض .. وتدخل ال 999 تجيب قادة المليشيات من جوة ليبيا ... ولما الشيطان وسوس للأغا العثمانلى .. طلع الطيران المجهول ضرب قاعدة الوطية مرتين . ولما اخدوا حبوب شجاعة . كان الخط الاحمر المصرى الشهير .. اللى اتحط مش للاتراك بس
ولكن لكل القوى الدولية اللى كانت بتعبث فى ليبيا
طب نلعب مع مصر من اثيوبيا وتتعرض مصر لضغوط اعلامية رهيبة واستفزازات غير مسبوقة لدفع مصر للتدخل فى اثيوبيا وضرب السد لدرجة ان مصر عملتها فعلا برضوا بمشرط جراح وقرصة ودن .. وطلع وقتها المتحدث الرسمى الاثيوبيى قالك ان صواعق جوية
ضربت بطاريات صواريخ الدفاع عن السد ... وبالمناسبة .. بطاريات الصواريخ دى كانت إسرائيلية.
ووصل الأمر فى الضغوط على مصر لدرجة تصريح رسمى للرئيس الاميريكى نفسه "دونالد ترامب" .. إن مصر لو ضربت السد هيكون معاها حق ... وإن ضرب السد مسألة وقت .. وكأنه بيعطى لمصر الضوء الأخضر
للقيام بعمل عسكرى ..ولم يتحرك جيش مصر ..لأنه كان عارف ان ده فخ زى الفخ اللى اتعمل للعراق !!
طب نولع فى السودان علشان الجيش المصرى يتدخل ..لأ
طب نولع فى ليبيا تانى .... لأ .. فرصة سعيدة
طب نعمل تحالف لحماية أوكرانيا .... بس يابابا
طب هاتى يامصر السلاح الروسى نديه لأوكراني
وإحنا هنديكى بداله سلاح امريكانى .... بس يابابا .. كخ كدة .. العب بعيد
طب غزة تولع .. والاعلام العالمى كله يقولك الحل ناخد سيناء .... وفجأة نلاقي اساطيل العالم كلها واقفة قدامك فى البحرين المتوسط والاحمر .. ووفود العالم كلها بتضغط عليك لقبول مخطط التهجير وانت على نغمة واحدة
ماخدوش يابابا ماخدوش يابابا ... والهدف إنك تتهور وتضرب أول طلقة .. علشان قوات الكوكب كله تشتبك معاك !! .. لكن الجيش كان بــ يمتص الموجة العاتية ، وبيلعب لعبة الصبر الإستراتيجى
فيطلع الحوثى يقفل باب المندب ... ونبدأ نشوف المسيرات والصواريخ جاية من تحت زى بمب العيد
قال يعنى بنضرب دولة الكيان بقى وكدزة ...
فيقوم الدفاع الجوى المصرى بإسقاط كل مايهدد سماء مصر !!
طب ياجماعة إحنا بقى هنعمل تحالف دولى من 40 دولة علشان نضرب الحوثى .. ولازم مصر تبقى معانا علشان نحمى حرية الملاحة فى البحر الأحمر ... فمصر ترد وتقول .. يالا يابابا
مصر مش بتلعب اللعبة دى ... فالتحالف يبوظ ..
وشوف يا أخى ... يعنى هو التحالف ماينفعش من غير مصر !!
وأخيرا ....
طب دولة الكيان بقى بذات نفسها تتحرش بمصر .. بس يابابا !!
طب هنحدفكم بالطوب ..... بس يابابا
طب هندخل محور فيلادلفيا .... طب جرب كدة ونشوف
طب هندخل رفح ونقتحم السور .... طب لو راجل قرب !!
وفى كل مرة من دوول .. بــ يبقى فيه غطاء إعلامى كبير ، وضغط غير طبيعى على السوشيال ميديا ، للضغط على الجيش المصرى للتحرك ... وللأسف .. كان فيه مصريين كتير بتسقط فى الفخ ده !!
ياترى إنت كنت من الناس اللى إتسحلت فى التريندات دى
وشاركت فى الضغط على جيش بلدك معاهم !!؟ ...
ماتجاوبش .. إحتفظ بالإجابة لنفسك .. وخليك فاكرها :
الخلاصة .
كل مرة تترسم الرسمة .. وتتلعب اللعبة علشان يتم توريط الجيش المصرى فى حرب .. ودايما الجيش المصرى بالذات مش اى حد تانى إما من خلال تهديد منفرد ضد مصر بخلفية اممية طبعاً
أو من خلال تحالف دولى يتحط فيه الجيش المصرى فى القلب .. وشوف الصدف ان التحالفات دى بتقف ... لما مصر تقول لأ ... ياسلام ... هو انتوا حالفين يعنى .. وإلا الجيش المصرى هو الوحيد اللى متوضئ فيكم !!
طب هل جيش مصر ساكت !!؟
طبعا لأ ...
بيتدخل .. لكن بمشرط جراح زى ماقولنا ... و برد قاطع وحازم ..
زى ماحصل فى المتوسط مع الاغا.
وزى ماحصل فى ليبيا وفرضنا الخط الأحمر فى مواجهة اطراف دولية رضخت للخط الأحمر لأن الجيش المصرى علم عليهم وكان له تحركات وضربات "بيان على المعلم" .. والقوى الدولية مش بتجيب وراء
الا لو عارفين ان ايدك طايلة !!
وده اللى عملته مصر فى المتوسط فى نوفمبر الماضى واظهرت العين الحمراء لإحدى الدول العظمى ، وكبدتها خسائر .. واللى نوهنا عنه بإقتضاب فى مقال سابق .. !!
طب لييه مصر مش بتعلن للعالم ده !!؟
اولا .. سياسيا وإقتصادياً وعسكرياً ماينفعش
ماينفعش إنك تعلن للعالم إنك دولة فى حالة حرب ..
ثانيا .. مصر مايهمهاش ان العالم يعرف .. لكن اللى يهمها بس ان اصحاب الشأن يعرفوا ويشوفوا العين الحمراء .. زاى ما الضابط المصرى قالها فى فيلم الممر "إحنا مايهمناش العالم يعرف ..إحنا مش بتوع شو زيكم إحنا بس يهمنا أن انتوا تعرفوا
وعنينا تبقى دايما مرفوعة قدامكم"
طب هل جيش مصر ضعيف !!؟
لو جيش مصر ضعيف ... كان زمان العالم كله على أرضك .. وبص حواليك فى ليبيا وسوريا والسودان والعراق .. و ده غير القواعد العسكرية المتواجدة فى دول الجوار بموافقة شعوبها وحكوماتها !!
لو جيش مصر ضعيف ماكانش يتم محاولة استدراجك
واستنزافك طول الوقت علشان يتم تدميرك !!!
طب السؤال الاخير!!؟
هل مصر داخلة حرب خلاص !!؟
شوف ياصديقى انت اصلا عايش فى اقتصاد حرب بقالك سنتين ويمكن أكثر شوية، استعدادا للحظة الحرب اللى فيه محاولات حثيثة لاستدراجك ليها
وانت مستعد ..وفى أقوى قوتك
لكن قرار الحرب مش هيبقى قرارهم
هيبقى قرارك انت ....
انت اللى هتقرر امتى تضرب ضربتك ..
وامتى تحط خط أحمر ..
وامتى تورى العين الحمرا ...
وامتى تحارب ..
خيارك الاستراتيجى الأول انك ماتتورطش فى حرب
وربنا معانا .. وهينصرنا ...
بسم الله الرحمن الرحيم
"كُلَّمَا أَوْقَدُوا نَارًا لِلْحَرْبِ أَطْفَأَهَا اللَّهُ وَيَسْعَوْنَ فِي الْأَرْضِ فَسَادًا وَاللَّهُ لَا يُحِبُّ الْمُفْسِدِينَ" .... صدق الله العظيم
انت بتلعب فى الخلفية لعبة دبلوماسية عظيمة ...
ولعبة إستراتيجية ولا أروع ...
ولعبة مخابراتية هتتكتب فى التاريخ ...
وبتستخدم كل ادواتك علشان تخرج منتصر بدون التورط فى حرب مباشرة ..
وهتنتصر .....
هتنتصر بدون حرب ...
وهتنتصر لو حاربت ...
خلصانة بسوليفانة !!
حفظ الله مصر برئيسها وجيشها وشعبها
تحيا_مصر
تحيا_مصر_بجيشها_وعاش_السيسي
تعليقات
إرسال تعليق